ৰাজ্যখনৰ ভেঞ্চাৰ শিক্ষানুষ্ঠানসমূহত কৰ্মৰত শিক্ষক, কৰ্মচাৰীৰ পদসমূহ প্ৰাদেশিকীকৰণ নকৰি ন ন ধাৰা, উপধাৰা সন্নিৱিষ্ট কৰি শিক্ষক-কৰ্মচাৰীসকলৰ জীৱন আৰু অসমীয়া মাতৃভাষা মাধ্যমৰ শিক্ষানুষ্ঠানসমূহ নিঃশেষ কৰাৰ লক্ষ্যেৰে অসম ভেঞ্চাৰ শিক্ষানুষ্ঠান পদ প্ৰাদেশিকীকৰণ আইন ২০১১, সংশোধন ২০১২, সংশোধন ২০১৩ প্ৰণয়ন কৰাৰ অভিযোগ উত্থাপন কৰিছে অসম শিক্ষক-কৰ্মচাৰী ঐক্যমঞ্চই।
অসম শিক্ষক-কৰ্মচাৰী ঐক্যমঞ্চৰ সহকাৰী সাধাৰণ সম্পাদক প্ৰাঞ্জল কুমাৰ শৰ্মা আৰু কামৰূপ জিলা শিক্ষক-কৰ্মচাৰী ঐক্যমঞ্চৰ সভাপতি উমেশ কলিতাই জানিবলৈ দিয়ে যে প্ৰাদেশিকীকৰণ আইন ২০১১ৰ সংশোধনী আইন ২০১২, আইন ২০১৩ৰ অধীনত বিত্ত বিভাগত থকা নিম্ন প্ৰাথমিক ২৮৮৮খন, উচ্চ প্ৰাথমিক ৩১৩৫খন, উচ্চ মাধ্যমিক ২২৫খন, উচ্চতৰ মাধ্যমিক ১১৪খন, সংস্কৃত টোল ৮৫খন, ছিনিয়ৰ মাদ্ৰাছা ২০, প্ৰি ছিনিয়ৰ মাদ্ৰাছা ১৪৩খন আৰু প্ৰথম পৰ্যায়ত ৰৈ যোৱা মাধ্যমিক পৰ্যায়ৰ ৯৬খনসহ মুঠ ৬৮৯৬খন শিক্ষানুষ্ঠানৰ ৩২ হাজাৰ শিক্ষক কৰ্মচাৰী নিযুক্তি-পত্ৰ পোৱাৰ আশাত এতিয়াও বন্দী হৈ আছে।
এনে বৈষম্যমূলক আচৰণ ত্যাগ কৰি পদ প্ৰাদেশিকীকৰণৰ আইন ২০১১ৰ অধীনত নিযুক্তি লাভ কৰা ৪২ হাজাৰ শিক্ষক-কৰ্মচাৰীক যেনেদৰে সুৰক্ষা প্ৰদান কৰিছে, ঠিক সেইদৰে একে আইনৰ অধীনত বিত্ত বিভাগত থকা ৩২ হাজাৰ শিক্ষক-কৰ্মচাৰীৰ পদসমূহো প্ৰাদেশিকীকৰণৰ বাবে শিক্ষক-কৰ্মচাৰী ঐক্যমঞ্চই দাবী জনায়।
তেওঁলোকে লগতে কয় যে উক্ত শিক্ষানুষ্ঠানসমূহৰ ২০১২ চনৰ ১০০ টকাকৈ ট্ৰেজাৰী চালান থকা ১৯৮৫ চনৰ পৰা বৰ্তমানলৈ বিনা বেতনে সেৱা কৰি থকা শিক্ষক-কৰ্মচাৰীসকলৰ অৱসৰৰ সময়ো সমাগত। তাৰ পাছতো চৰকাৰে গুৰুত্ব প্ৰদান নকৰাত অসম শিক্ষা (শিক্ষকৰ সেৱা প্ৰাদেশিকীকৰণ আৰু শিক্ষানুষ্ঠান পুনৰ গঠন) আইন ২০১৭ সংশোধনৰ দাবীত অসম শিক্ষক-কৰ্মচাৰী ঐক্যমঞ্চই অহা ৫ ছেপ্টেম্বৰত (শিক্ষক দিৱস)ৰ দিনা ১০ বজাত ৰাজভৱন চলো কাৰ্যসূচী ৰূপায়ণৰ সিদ্ধান্ত গ্ৰহণ কৰিছে।
অসমৰ সৰ্বস্তৰৰ ভেঞ্চাৰ শিক্ষানুষ্ঠানত কৰ্মৰত সকলো শিক্ষক-কৰ্মচাৰীকে উক্ত দিনা তাৰকাগৃহ, লতাশিল খেলপথাৰ, উজানবজাৰ, গুৱাহাটীত উপস্থিতি হ’বলৈ আহ্বান জনাইছে ঐক্যমঞ্চৰ নেতৃবৃন্দই।
