‘চলিত বছৰৰ ভিতৰতে নিৰ্মাণকাৰ্য সম্পূৰ্ণ হৈ উঠিব বগীবিল দলঙৰ। এই দলংখনে ৰাজ্যৰ উন্নয়নত এক গুৰুত্বপূৰ্ণ ভূমিকা প্ৰদান কৰিব। কেবল অসমে নহয় অৰুণাচল প্ৰদেশৰ সৈতেও দলংখনে যোগাযোগ তথা অৰ্থনৈতিক উত্তৰণত বিশেষ ভূমিকা ল’ব’। এই মন্তব্য মুখ্য মন্ত্ৰী সৰ্বানন্দ সোণোৱালৰ।
আজি মুখ্য মন্ত্ৰী সোণোৱালে ব্ৰহ্মপুত্ৰৰ দক্ষিণপাৰ-উত্তৰপাৰ সংযোগী বগীবিল দলঙৰ নিৰ্মাণ কাৰ্যৰ অগ্ৰগতিৰ বুজ ল’বলৈ গৈ সংবাদ মাধ্যমৰ আগত এই কথা প্ৰকাশ কৰে। তেওঁ লগতে কয় যে দলংখন উদ্বোধনৰ বাবে ৰাজ্য চৰকাৰৰ তৰফৰ পৰা প্ৰধান মন্ত্ৰী নৰেন্দ্ৰ মোদীক অনুৰোধ জনোৱা হ’ব।
বগীবিল দলঙে অসম তথা উত্তৰ-পূৰ্বাঞ্চলৰ আৰ্থ-সামাজিক তথা ব্যৱসায় বাণিজ্যৰ দিশত বৃহৎ উত্তৰণৰ সূচনা কৰিব। ইতিমধ্যে বগীবিল দলঙৰ ৰে’লৱেৰ কাম সম্পূৰ্ণ হৈ উঠিছে বুলি উল্লেখ কৰি তিনি লাইনযুক্ত পথৰ কামো নিৰ্দ্ধাৰিত সময়ৰ ভিতৰত সম্পূৰ্ণ কৰাৰ বাবে সংশ্লিষ্ট বিভাগক আজিৰ এই পৰিদৰ্শন কালত মুখ্য মন্ত্ৰীয়ে বিভাগীয় কৰ্তৃপক্ষক নিৰ্দেশ দিয়ে।
আনহাতে দলংখনৰ নামাকৰণক লৈ বিভিন্ন দল-সংগঠনে হাহাকাৰ কৰি থকা সন্দৰ্ভত মুখ্য মন্ত্ৰীক প্ৰশ্ন কৰোতে কয় যে নিৰ্মাণ সম্পূৰ্ণ হোৱাৰ পাছত নামাকৰণ সম্পৰ্কত কেন্দ্ৰীয় চৰকাৰে সিদ্ধান্ত গ্ৰহণ কৰিব।
উল্লেখযোগ্য যে দলংখনৰ কাম কাজৰ বুজ লোৱাৰ পাছত মুখ্য মন্ত্ৰীয়ে দলঙৰ সমীপত থকা ৰে’লৱে গেষ্ট হাউছত উত্তৰ-পূব সীমান্ত ৰে’লৱেৰ মহাপ্ৰৱন্ধককে ধৰি নিৰ্মাণ কাৰ্যৰ লগত জড়িত বিভিন্ন বিষয়াসকলৰ সৈতে এক গুৰুত্বপূৰ্ণ আলোচনাত মিলিত হয়। বৈঠকত সোণোৱালে বিষয়াসকলক নিৰ্দ্ধাৰিত সময়ৰ ভিতৰত কাম সম্পূৰ্ণ কৰিবলৈ নিৰ্দেশ দিয়ে।
মুখ্য মন্ত্ৰীৰ আজিৰ এই বগীবিল দলং পৰিদৰ্শনৰ সময়ত সাংসদ ৰামেশ্বৰ তেলী, বিধায়ক ক্ৰমে প্ৰশান্ত ফুকন, ঋতুপৰ্ণ বৰুৱা, চক্ৰধৰ গগৈ, ভূৱন পেগুৰ লগতে বিভিন্ন লোক উপস্থিত থাকে।
