ভাৰতীয় নৌসেনাৰ বিশেষজ্ঞ ডুবাৰুৱেও দিনজোৰা অভিযান চলাই সফল নহ’ল শিৱসাগৰৰ দিখৌ নদীত দুৰ্ঘটনাত পতিত হৰেন বৰাৰ পৰিয়ালটোৰ শুংসূত্ৰ উলিওৱাত।
দুৰ্ঘটনাটোৰ আজি চতুৰ্থ দিন সত্ত্বেও আৰু এছ ডি আৰ এফ, এন ডি আৰ এফৰ উপৰি নৌসেনাৰ অভিযানকাৰী দলৰ কোনো সফলতা নাই। আজি নৌসেনাৰ ৮জনীয়া দলটোৱে পুৱা ৬ বজাৰ পৰা সকলো সা-সঁজুলি লৈ অভিযান চলায়। ছাইড স্কেন ছ’নাৰৰ সহায়ত নদীৰ বুকুত গাড়ীখনৰ অৱস্থিতি ধৰা পেলাবলৈ চেষ্টা কৰে।
ঘটনাস্থলীৰ পৰা প্ৰায় চাৰে তিনি কিলোমিটাৰ আগলৈকে ছ’নাৰ স্কেনাৰৰ দ্বাৰা অভিযান চলোৱা হৈছিল যদিও কোনো ধৰণৰ তথ্য লাভ নকৰিলে।
জিলাৰ উপায়ুক্ত পল্লৱগোপাল ঝাই সংবাদমেল সম্বোধন কৰি এই কথা জানিবলৈ দিয়ে।
অগ্নি আৰু আপদকালীন সেৱা বিভাগৰ সঞ্চালক তথা অতিৰিক্ত আৰক্ষী সঞ্চালক প্ৰধান ভাস্কৰজ্যোতি মহন্তই পূৰ্বে জনোৱামতে নৌসেনাৰ দলটোৱে অত্যাধুনিক সা-সঁজুলি লৈ অভিযান চলাইছিল আৰু অভিযান চলোৱা অংশটোত গাড়ীখন নথকাটোত নিশ্চিত হৈছে দলটো।
আনহাতে কালি তেওঁ গুৱাহাটীৰ এখন সংবাদমেলত দিখৌৰ ঘোলা পানী আৰু সোঁতে অভিযান বাধাগ্ৰস্ত কৰিছে বুলি কৈছিল যদিও আজি কয় যে অভিযানকাৰীয়ে কোনো অসুবিধা পোৱা নাই।
বিষয়াজনৰ মতে, নদীৰ পানী কালিতকৈ শুকাইছে আৰু পানীৰ তলত মাটি বা পলস নাই। ফলত বহুতে সন্দেহ কৰাৰ দৰে গাড়ীখন পলসত পোত যোৱা নাই।
উল্লেখ্য যে এই স্থানৰ পৰা কিছু দূৰত দিখৌ-ব্ৰক্ষ্মপুত্ৰ-দিচাং নদীৰ সংগম স্থান আছে, যাক দিখৌমুখ বোলা হয়। স্থানীয় একাংশ ব্যক্তিৰ মতে গাড়ীসহ দুৰ্ঘটনাত পতিতসকল সেই স্থানলৈও হয়তো উটি যাব পাৰে।
অভিযানৰ সময়ত নদীৰ মাজত ছাইড স্কেন ছ’নাৰ যন্ত্ৰৰ দ্বাৰা আজি কেইবা ঠাইত শব্দৰ তৰংগৰ জৰিয়তে পানীৰ মাজত কিবা পদাৰ্থৰ সম্ভেদ পাইছিল যদিও পিছত নৌসেনাৰ ডুবৰুৱে পানীৰ তলত অভিযান চলাই সেইয়া আন বস্তু বুলি নিশ্চিত হয়।
উল্লেখযোগ্য যে আজিৰ অভিযানত ১৪খন নাও ১৩৭জন জোৱান আৰু ৪৭গৰাকী ডুৱাৰুৱে গোটেই দিন অভিযান চলায়। দলটোৱে কাইলৈ পুৱা পুনৰ অভিযান চলাব নতুন সীমাৰ পৰা।
