গোৱালপাৰা চহৰৰ উপকণ্ঠ অঞ্চল বলদমাৰী চৰত এটা মোবাইলক কেন্দ্ৰ কৰি দুই ফৈদৰ মাজত মাৰপিট হোৱা ঘটনাত এজন লোকৰ মত্যু হোৱাৰ লগতে আন ২৭ জন লোক আহত হোৱাৰ উত্তেজনা মাৰ নৌযাওতেই কালি সন্ধিয়া জিলাখনৰ কৃষ্ণাইত ১৫০ টকাক লৈ সংঘটিত মাৰপিটত চাৰিজন লোক গুৰুতৰ ভাৱে আহত হোৱাৰ ঘটনাই অঞ্চলটোত ব্যাপক চাঞ্চল্যৰ সৃষ্টি হৈছে।
ঘটনাৰ বিৱৰণী মতে জিলাখনৰ কৃষ্ণাই থানাৰ অন্তৰ্গত বিদ্যাপাৰা গাঁৱৰ আবু হাসেমে একে গাঁৱৰে ৰেজ্জাক আলীৰ পৰা ১৫০ টকা পাবলৈ আছিল। বুধবাৰে সন্ধিয়া টকা কেইটা খোজাত ৰেজ্জাক আলীৰ ভাতৃ নিজাম আলীয়ে ৫০ টকা দিছিল। কিন্তু বাকী থকা টকাখিনি সংগ্ৰহৰ বাবে আবু হাসেমে কেইবাগৰাকী লোকৰ সহযোগত ৰেজ্জাক আলীক মাৰপিট কৰি অচেতন অৱস্থাত পেলাই থৈ যায়।
উক্ত ঘটনা অৱগত হোৱাত ৰেজ্জাক আলীৰ ভাতৃ ক্ৰমে নিজাম আলী, জাকিৰ হুছেইন আৰু আব্দুল আজিজে আবু হাসেমৰ ঘৰত উপস্থিত হোৱাৰ লগে লগে পূৰ্বৰে পৰা চোকা অস্ত্ৰৰে প্ৰস্তুত হৈ থকা আবু হাসেমৰ দলটোৱে আক্ৰমণ চলোৱাত চাৰিওগৰাকী ভাতৃ গুৰুতৰভাৱে আহত হয়।
আহত সকল ক্ৰমে ৰেজ্জাক আলী,জাকিৰ হুছেইন,নিজাম আলী আৰু আব্দুল আজিজক তৎক্ষনাত গোৱালপাৰা অসামৰিক চিকিৎসালয়ত ভৰ্তী কৰোৱা হয়।
ইয়াৰে ৰেজ্জাক আলীৰ অৱস্থা সংকটজনক হোৱাত চিকিৎসকে উন্নত চিকিৎসাৰ বাবে গুৱাহাটী চিকিৎসা মহাবিদ্যালয় হস্পিটাললৈ প্ৰেৰণ কৰে।
