বোকাখাত নগৰত নীতি বহিৰ্ভূতভাৱে চলি থকা ই-ৰিক্সাৰ বিৰুদ্ধে আজি জিলা পৰিবহণ বিভাগে বোকাখাত আৰক্ষীৰ সহযোগত অভিযান চলায় ৷ বোকাখাত আৰক্ষী থানাৰ সমীপতে গোলাঘাট জিলা পৰিবহণ বিষয়া মনোজ কুমাৰ চৌধুৰী আৰু বোকাখাত মহকুমা আৰক্ষী বিষয়া বিতুল চেতিয়াৰ উপস্থিতিত চলোৱা এই অভিযানত জিলা পৰিবহণ বিষয়াই সমুহ ই-ৰিক্সাৰ বিভাগীয় নথিপত্ৰ আৰু পঞ্জীয়ন প্ৰমাণপত্ৰ নথকা বোকাখাতৰ প্ৰায় শতাধিক ই-ৰিক্সা জব্দ কৰে ৷
এই জব্দ কৰা ই-ৰিক্সাবোৰ বোকাখাত মহকুমা আৰক্ষী বিষয়াৰ কাৰ্যালয়ৰ প্ৰাংগণলৈ লৈ যোৱা হয় ৷ জিলা পৰিবহণ বিষয়াই চলোৱা এই অতৰ্কিত অভিযানত বোকাখাত নগৰত ই-ৰিক্সাৰ চালকসকলৰ মাজত হাহাকাৰৰ সৃষ্টি হয় ৷
বোকাখাতৰ ই-ৰিক্সা সন্থাৰ সভাপতি বিজয় কুটুমে নৰ্থ ইষ্ট নাওক জনোৱা মতে কোনো আগতীয়া জাননী নিদিয়াকৈ চলোৱা এই অভিযানে বিপদত পেলাইছে ই-ৰিক্সা চলোৱা বোকাখাতৰ নিবনুৱা যুৱক সকলক, বিশেষকৈ যিসকলে ই-ৰিক্সা চলায়েই পৰিয়ালৰ পোহপাল দি আহিছে ৷ বোকাখাতৰ ই-ৰিক্সা সন্থাৰ সভাপতি গৰাকীয়ে কয়, ‘’জিলা পৰিবহণ বিষয়াৰ এনে কাৰ্যক আমি গৰিহণা দিয়াৰ লগতে প্ৰতিবাদো জনাইছো।‘’
ইফালে জিলা পৰিবহণ বিষয়াৰ মতে বিধিগতভাৱে প্ৰতিখন ই-ৰিক্সাই পঞ্জীয়ন কৰাটো বাধ্যতামুলক। সেয়েহে জব্দ কৰা ই-ৰিক্সা সমুহক অচিৰেই এটা নিৰ্দিষ্টি দিনত বোকাখাততেই পঞ্জীয়ন কৰাৰ ব্যৱস্থা কৰিব পৰিবহণ বিভাগে আৰু ইয়াৰ বাবে ই-ৰিক্সাবোৰে পঞ্জীয়ন নোহোৱাকৈ চলোৱাৰ বাবে এক জৰিমনাও ভৰিব লাগিব বুলিও তেওঁ নৰ্থ ইষ্ট নাওক জানিবলৈ দিয়ে ৷
যাত্ৰীবাহী এই ই-ৰিক্সাসমূহৰ নিজৰ আৰু যাত্ৰীৰ জীৱনৰ নিৰাপত্তাৰ স্বাৰ্থতেই পঞ্জীয়ন কৰাটো বাধ্যতামুলক বুলিও তেওঁ লগতে জনায় ৷
