ৰাজ্যখনৰ কেইবাহাজাৰো মাতৃভাষাৰ শিক্ষানুষ্ঠান বন্ধ হৈ পৰাত গভীৰ উদ্বেগ প্ৰকাশ কৰিছে অসম সাহিত্য সভাই। সভাৰ সভাপতি ড০ পৰমানন্দ ৰাজবংশীৰ সভাপতিত্বত বৃহস্পতিবাৰে গুৱাহাটীত অনুষ্ঠিত হোৱা কৰ্ণধাৰ সমিতিৰ বৈঠকত এই বিষয়ে গভীৰ উদ্বেগ প্ৰকাশ কৰা হয়।
অসম সাহিত্য সভাৰ ভগৱতী প্ৰসাদ বৰুৱা ভৱনৰ ড০ মহেন্দ্ৰনাথ বৰুৱা সভাকক্ষত বৃহস্পতিবাৰে অনুষ্ঠিত কৰ্ণধাৰ সমিতিৰ বৈঠকত বিশেষভাৱে মাতৃভাষাৰ শিক্ষানুষ্ঠান বন্ধ হোৱা বিষয়টো সন্দৰ্ভত আলোচনা কৰা হয়।
মাতৃভাষাৰ শিক্ষানুষ্ঠান বন্ধ হোৱাৰ বিষয়ত গভীৰ চিন্তা ব্যক্ত কৰি অসম সাহিত্য সভাই এইক্ষেত্ৰত বিকল্প ব্যৱস্থাৰ চিন্তা-চৰ্চা কৰিছে।
শিশু এটাই মাতৃভাষাত আনুষ্ঠানিক শিক্ষা লাভ কৰাটো কেৱল প্ৰধান গুৰুত্বপূৰ্ণ বিষয়েই নহয়, ই সম্পূৰ্ণভাৱে মৌলিক অধিকাৰ। সেয়ে অসম সাহিত্য সভাৰ নেতৃত্বত এক নতুন ‘জাতীয় প্ৰাক্-প্ৰাথমিক আদৰ্শ বিদ্যালয় প্ৰকল্প’ আৰম্ভ কৰাৰ প্ৰচেষ্টা হাতত লোৱা হ’ব। এই আদৰ্শ প্ৰকল্পত অসমীয়া ভাষাৰ মাধ্যমেৰে ইংৰাজী ভাষা শিকোৱাত প্ৰধান গুৰুত্ব দিয়া হ’ব।
আনহাতে, অসম সাহিত্য সভাই অসমৰ জাতীয় জীৱনৰ লগত জড়িত এই গুৰুত্বপূৰ্ণ বিষয়টো সমাধানৰ বাবে অসম চৰকাৰৰ সৈতে আলোচনা কৰি সমস্যাটো সমাধানৰ বাবে বিকল্প ব্যৱস্থা গঢ়ি তোলাৰ বাবে সাজু হৈছে।
অসম চৰকাৰৰ পৰা সেউজ সংকেত পালেই এই কামখিনি আগন্তুক বৰ্ষৰ পৰাই আৰম্ভ কৰাৰ কথা চিন্তা কৰিছে সভাই। এই প্ৰকল্পৰ বাবে আৰম্ভণিতে এশখন ঠাই বিশেষকৈ গুৰুত্বপূৰ্ণ নগৰ নিৰ্বাচন কৰিবলৈ সভাই সিদ্ধান্ত গ্ৰহণ কৰিছে।
তদুপৰি, এই প্ৰকল্প ৰূপায়ণৰ বাবে অসম সাহিত্য সভাই শিক্ষাবিদ আৰু প্ৰৱাসী অসমীয়াক লৈ এখন উচ্চ পৰ্যায়ৰ সমিতি গঠন কৰিছে।
অসম সাহিত্য সভাই এই সন্দৰ্ভত অসমৰ সকলো শ্ৰেণীৰ ৰাইজৰ পৰামৰ্শ বিচাৰিছে। পৰামৰ্শসমূহ অসম সাহিত্য সভাৰ প্ৰধান সম্পাদক পদুম ৰাজখোৱালৈ [email protected] এই ঠিকনালৈ প্ৰেৰণ কৰিবলৈ সভাই অনুৰোধ জনাইছে।
অসম সাহিত্য সভাৰ উদ্যোগতে অসমীয়া ভাষা ৰক্ষাৰ গুৰু দায়িত্ব আহি পৰাৰ সময়ত সভাই গ্ৰহণ কৰা এই পদক্ষেপ আদৰণীয় হৈ পৰিছে।
