মহাপুৰুষ শ্ৰীমন্ত শংকৰদেৱ গুৰুজনাৰ পবিত্ৰ জন্মভূমি শ্ৰীশ্ৰী বটদ্ৰৱা থানখনক ধৰ্মীয় আৰু সাংস্কৃতিক পৰ্যটন ক্ষেত্ৰ হিচাপে গঢ়ি তুলিবলৈ অসম চৰকাৰে পদক্ষেপ গ্ৰহণ কৰিছে। ১৪৫ কোটি টকা ব্যয়েৰে এই প্ৰকল্পৰ কাম শীঘ্ৰে আৰম্ভ হ’ব। এই ক্ষেত্ৰত লৈছে বিশেষ পদক্ষেপ গ্ৰহণ কৰিছে ৰাজ্যখনৰ মুখ্যমন্ত্ৰী সৰ্বানন্দ সোণোৱালে। গুৰুজয়ন্তীৰ পিছতেই বিষয়টোৰ ক্ষেত্ৰত খোদ ৰাজ্যৰ মুখ্যমন্ত্ৰীগৰাকীয়েই বটদ্ৰৱা থানৰ উন্নয়নৰ প্ৰসংগটোত বিশেষ তৎপৰ হোৱা পৰিলক্ষিত হৈছে।
বটদ্ৰৱাত গুৰুজনাৰ স্মৃতি বিজড়িত ঐতিহাসিক সম্পদসমূহ বৈজ্ঞানিকভাৱে সংৰক্ষণৰ লগতে থানখনৰ উপৰি থান এলেকাৰ বিভিন্ন ক্ষেত্ৰৰ উন্নয়নকল্পে চৰকাৰীভাৱে ল’বলগীয়া বিভিন্ন কাম-কাজৰ অগ্ৰগতি সম্পৰ্কত ৰাজ্যৰ বিভাগীয় মন্ত্ৰী, বিষয়া তথা থান পৰিচালনা সমিতিৰ বিষয়ববীয়াৰ সৈতে মুখ্যমন্ত্ৰীগৰাকীয়ে বুধবাৰে অসম প্ৰশাসনীয় পদাধিকাৰী মহাবিদ্যালয়ত অনুষ্ঠিত এখন পৰ্যালোচনা বৈঠকত অংশগ্ৰহণ কৰে।
এই বৈঠকতে বটদ্ৰৱা থানৰ ঐতিহাসিক সম্পদসমূহৰ সংৰক্ষণৰ লগতে আন্তঃগাঁথনি উন্নয়ন সন্দৰ্ভত বিস্তৃত আৰু পূৰ্ণাংগ ডি পি আৰ শীঘ্ৰে প্ৰস্তুত কৰিবলৈ মুখ্যমন্ত্ৰী সৰ্বানন্দ সোণোৱালে বিভাগীয় বিষয়াক নিৰ্দেশ প্ৰদান কৰে।
অসমীয়া জাতিৰ প্ৰাণ প্ৰতিষ্ঠাতা মহাপুৰুষজনাৰ জন্মস্থানখনিক সৰ্বাংগসুন্দৰ ৰূপ দি ধৰ্মীয় আৰু সাংস্কৃতিক পৰ্যটন ক্ষেত্ৰ হিচাপে গঢ়ি তুলিবলৈ মুখ্যমন্ত্ৰীগৰাকীয়ে নিজাববীয়াকৈ লোৱা প্ৰচেষ্টাক বৃহত্তৰ বটদ্ৰৱাবাসী ৰাইজে শলাগ লোৱাৰ লগতে মুখ্যমন্ত্ৰীগৰাকীৰ নিৰ্দেশ প্ৰকৃতাৰ্থত কাৰ্যকৰী কৰাৰ দিশত চৰকাৰী বিষয়াসকলে কেনে ভূমিকা পালন কৰে সেয়া সময়তহে দেখা যাব বুলি তাৎপৰ্যপূৰ্ণ মন্তব্য কৰিছে।
মুখ্যমন্ত্ৰী সৰ্বানন্দ সোণোৱালৰ উদ্যোগত অনুষ্ঠিত বিশেষ সভাখনত মন্ত্ৰীদ্বয় কেশৱ মহন্ত, নৱ কুমাৰ দলে, বিধায়ক ক্ৰমে আঙুৰলতা ডেকা, ৰূপক শৰ্মা, ডিম্বেশ্বৰ দাস, নগাঁও জিলা উপায়ুক্ত বিশ্বজিৎ পেগুসহ কেইবাজনো শীৰ্ষ পৰ্যায়ৰ বিষয়া উপস্থিত আছিল। এই অভিলাষী প্ৰকল্পৰ কাম শীঘ্ৰে আৰম্ভ হ’ব বুলি বৃহত্তৰ বটদ্ৰৱাবাসী ৰাইজে অতি আগ্ৰহেৰে বাট চাই ৰৈছে।
