দুৰ্গা পূজাৰ পূৰ্বে ৰাজ্যিক কৰ্মচাৰী সকলৰ বাবে আহিল আন এক সুখবৰ। পুনৰ দুই শতাংশ বৃদ্ধি পালে কৰ্মচাৰীসকলৰ মৰগীয়া বানচ। মুখ্য মন্ত্ৰী সৰ্বানন্দ সোণোৱালে প্ৰতিশ্ৰুতি প্ৰদান কৰা অনুসৰি কৰ্মচাৰীসকলক ২ শতাংশ মৰগীয়া বানচ প্ৰদান কৰাৰ বাবে মঙলবাৰে সিদ্ধান্ত গ্ৰহণ কৰিছে বিত্ত বিভাগে।
উল্লেখ্য যে কৰ্মচাৰীসকলে পহিলা জুলাইৰ পৰা বৰ্ধিত ডি এ লাভ কৰিব। এই বৰ্ধিত মৰগীয়া বানচৰ ফলত মাহিলি ৰাজকোষৰ পৰা অতিৰিক্তভাৱে ৫০ কোটি টকা ব্যয় হ’ব বুলি জানিব পৰা গৈছে।
আনহাতে, দুই শতাংশ ডি এ বৃদ্ধিৰ ফলত এতিয়াৰে পৰা ৰাজ্যিক কৰ্মচাৰীসকলৰ মৰগীয়া বানচ পূৰ্বৰ সাতৰ পৰা ন শতাংশলৈ বৃদ্ধি পাইছে।
মঙলবাৰে মুখ্য মন্ত্ৰী সোণোৱাল তথা বিত্ত বিভাগে প্ৰদান কৰা নিৰ্দেশনাক সদৌ অসম কৰ্মচাৰী পৰিষদে আন্তৰিকতাৰে আদৰণি জনোৱা পৰিলক্ষিত হয়।
