শনিবাৰ অৰ্থাৎ ১৩ অক্টোবৰৰ পৰা শিৱসাগৰৰ ব’ৰ্ডিং খেলপথাৰত আৰম্ভ হৈছে কৃষ্ণ গুৰুৰ আন্তৰ্জাতিক আধ্যাত্মিক যুৱ সমাজৰ বিংশতিতম দ্বি-বাৰ্ষিক অধিৱেশন।
পুৱা পতাকা উত্তোলন, বৃক্ষ ৰোপণ, স্বচ্ছতা অভিযান, বিনামূলীয়া চিকিৎসা শিবিৰ মুকলি কৰাৰ পাছত বিয়লি ৩ বজাৰ পৰা অনুষ্ঠিত হয় কৃষ্ণ গুৰুৰ আধ্যাত্মিক আলোচনা চক্ৰ। ‘যুৱ সমাজৰ বাবে আধ্যাত্মিক জ্ঞাপন প্ৰয়োজনীয়তা’ শীৰ্ষক আলোচনা চক্ৰৰ সঞ্চালন কৰে কৃষ্ণ গুৰু যুৱ সমাজৰ সভাপতি ধন গগৈয়ে।
আলোচনা চক্ৰৰ মুখ্য অতিথি হিচাপে অংশ গ্ৰহণ কৰি কৃষ্ণ গুৰুৰ আধ্যাত্মিক বিশ্ব বিদ্যালয়ৰ অসমীয়া বিভাগৰ মূৰব্বী অধ্যাপক ড০ মাধুৰ্য্যমণ্ডিত বৰুৱাই কয় যে বিজ্ঞান আৰু আধ্যাত্মিকতা পৰিপূৰক শব্দ। বিজ্ঞান আৰু প্ৰযুক্তিৰ লগত আধ্যাত্মিকতাৰ সম্পৰ্ক আছে।
তাৰোপৰি বৰুৱাই কয় যে, ‘আত্মসংযমৰ শিক্ষা কেৱল আধ্যাত্মিকতাইহে দিব পাৰে।আমাৰ ছয় ৰিপু দমন কৰি জীৱনক আধ্যাত্মিকতাৰ জৰিয়তেহে সমৃদ্ধ কৰিব পৰা যায়।আধ্যাত্মিক শিক্ষা নথকাৰ বাবেই সমগ্ৰ বিশ্বত হিংসা , হত্যা, ধৰ্ষণৰ দৰে ঘটনা বৃদ্ধি পাব ধৰিছে।’
এই আধ্যাত্মিক আলোচনা চক্ৰত শৈলেন বড়ো ডেকা অধিকাৰ, কৃষ্ণ গুৰু আধ্যাত্মিক বিশ্ববিদ্যালয়ৰ উপাচাৰ্য ড০ তৰুণ চন্দ্ৰ বড়া, হেমকান্ত বড়া মেধি, স্বৰ্ণজ্যোতি বৰুৱা বৰবৰা আৰু মানসজ্যোতি সন্দিকৈয়ে ভাষণ দিয়ে। অনুষ্ঠানৰ পূৰ্বে সমীৰ দত্তই আলোচনা চক্ৰৰ তাৎপৰ্য্য ব্যাখ্যা কৰে।
উল্লেখ্যযোগ্য যে আজি দিনৰ ১২ বজাত এই দ্বি-বাৰ্ষিক অধিৱেশনৰ মুকলি সভা অনুষ্ঠিত হব। কৃষ্ণ গুৰুৰ আন্তঃৰাষ্ট্ৰীয় পৰিচালনা সমিতিৰ সভাপতি মুকুল ডেকাৰ সঞ্চালনত অনুষ্ঠিত হ’ব লগা মুকলি সভাত অসমৰ মুখ্য মন্ত্ৰী সৰ্বানন্দ সোণোৱালে মুখ্য অতিথি হিচাপে অংশ গ্ৰহণ কৰিব।
