ডাও ডিভিজনৰ অন্তৰ্গত ভাৰতীয় সেনাৰ জয়সাগৰ সেনা চাউনীৰ এটা সেনাৰ দলে অভিযান চলাই মি: আলী নামৰ আলফাৰ (স্বা:) সদস্যজনক আটক কৰিবলৈ সক্ষম হৈছে। মি: হৈছে আলফাৰ বোমা বিশেষজ্ঞ ওভাৰগ্ৰাউণ্ড কৰ্মী। উল্লেখ্য যে সোণাৰি সেনা চাউনীয়ে বহু দিনৰে পৰা মি: আলীৰ গতি-বিধি ওচৰৰে পৰা লক্ষ্য কৰি আছিল। এইগৰাকী আলফা সদস্যই বিগত এসপ্তাহত এই এলেকাটোত চলাই সক্ৰিয় হৈ থকা আলফা উগ্ৰপন্থী আৰু ওভাৰগ্ৰাউণ্ড কৰ্মীৰ ধন দাবী চক্ৰটোৰ গুৰুত্বপূৰ্ণ সংযোগ-সেতু আছিল বুলি সন্দেহ কৰা হৈছে।
স্থানীয় সূত্ৰৰ পম খেদি সোণাৰি সেনা চাউনীয়ে এই আলফা সদস্যজনক আটক কৰিবলৈ এটা সেনাৰ দল প্ৰেৰণ কৰে আৰু আইইডি বিষ্ফোৰকেৰে সৈতে আলফা সদস্যজনক হাতে-লোটে ধৰা পেলায়। সেনাৰ বাৰ্তা লাভ কৰি শিৱসাগৰৰ আৰক্ষী অধীক্ষক আৰু আৰক্ষী উপ অধীক্ষক ঘটনাস্থলীত উপস্থিত হৈ এটা প্ৰাথমিক তদন্ত সম্পন্ন কৰে।
উল্লেখ্য যে ধৃত আলফা (স্বা:)সদস্য মি: আলীয়ে শিৱসাগৰ চহৰৰ ব্যৱসায়ী, দোকানী আৰু দৰমহা পোৱা কৰ্মচাৰীৰ পৰা বিপুল পৰিমাণৰ ধন উচুল কৰি আহিছিল।
নিৰাপত্তাৰক্ষীয়ে নিৰৱচ্চিন্ন সতৰ্ক পহৰা অব্যাহত ৰাখি পূৰ্ব প্ৰস্তুতিপূৰ্বকভাৱে অভিযান চলাই অহাৰ বাবে শেহতীয়াভাৱে জনসাধাৰণ আলফাৰ (স্বা:) বেআইনী ভাবুকিৰ দ্বাৰা ভীতিগ্ৰস্ত নহৈ ধন দাবীৰ চক্ৰটোক ধৰা পেলোৱাত নিৰাপত্তাৰক্ষীৰ সহায়ক হৈ পৰিছে।
মি: আলীয়ে আলফা (স্বা:) নেতৃত্বৰ পৰা নিৰ্দেশ লাভ কৰাৰ পাছত শিৱসাগৰ চহৰত এটা আইইডি বোমা স্থাপন কৰি সেইটো বিষ্ফোৰিত কৰি জনসাধাৰণক ভীতিগ্ৰস্ত কৰি বলেৰে ধন সংগ্ৰহৰ পৰিকল্পনা কৰিছিল।
সোণাৰি সেনা চাউনীয়ে উজনি অসমত সক্ৰিয় আলফাৰ এই ধন দাবী চক্ৰটোৰ ওপৰত সফল অভিযানেৰে স্থানীয় লোকসকলক ধন দাবীৰ নিৰবিচ্চিন্ন হেঁচাৰ পৰা ৰক্ষা কৰিছে। আলফাৰ ধন দাবীয়ে অঞ্চলটোৰ ৰাইজৰ স্বাভাৱিক জীৱনযাত্ৰা যথেষ্ট ক্ষতিগ্ৰস্ত কৰি তুলিছিল।
অঞ্চলটোলৈ শান্তি ঘূৰাই অনাৰ বাবে স্থানীয় বাসিন্দা আৰু অসামৰিক প্ৰশাসনে সমগ্ৰ অসমবাসীৰ হৈ জয়সাগৰ সেনা চাউনীৰ সেনা-বিষয়াসকললৈ ধন্যবাদ জ্ঞাপন কৰিছে।
