নাগৰিকত্ব সংশোধনী বিধেয়ক বাতিলৰ দাবীত অসমত প্ৰবল প্ৰতিবাদ অব্যাহত আছে। বিধেয়কখন আইনত পৰিণত কৰিলে অসম চুক্তি উলংঘা কৰা হ’ব। গতিকে অসম চুক্তি উলংঘা নকৰাৰ বাবে এক সংকল্প প্ৰস্তাৱ গ্ৰহণ কৰাৰ দাবী জনাইছে বিধান সভাৰ বিৰোধী দলপতি দেৱব্ৰত শইকীয়াই।
বৃহস্পতিবাৰে অসম বিধান সভাৰ কংগ্ৰেছ বিধায়িনী দলৰ কক্ষত এখন সংবাদমেল অনুষ্ঠিত কৰি বিৰোধী দলপতি দেৱব্ৰত শইকীয়াই এই সংকল্প প্ৰস্তাৱ গ্ৰহণৰ বাবে বিধান সভাৰ বিশেষ অধিবেশনৰ দাবী কৰে।
তেওঁ কয়, ‘‘বিজেপিৰ নেতৃত্বত বিদেশীক নাগৰিকত্ব প্ৰদান কৰাৰ লগতে ধৰ্মীয় মেৰুকৰণৰ যি প্ৰচেষ্টা চলি আছে সেয়া প্ৰত্যাহাৰ হ’ব লাগে আৰু অসমীয়াৰ স্বাৰ্থত অসম চুক্তিৰ যাতে কোনো ধৰণৰ তাৰতম্য নঘটে তাৰ বাবে অসম চৰকাৰে এক সংকল্প প্ৰস্তাৱ গ্ৰহণ কৰিব লাগে। তাৰ বাবে অসম চুক্তি ৰূপায়ণ বিভাগৰ মন্ত্ৰীয়ে অসম চৰকাৰৰ হৈ অধ্যক্ষক বিধান সভাৰ বিশেষ অধিবেশন আহ্বান কৰিবলৈ পৰামৰ্শ দিব লাগে।‘’
শইকীয়াই লগতে বৰ্তমান শাসকীয় দলৰ মন্ত্ৰী, বিধায়ক আৰু মুখপাত্ৰসকলে বিধেয়ক খনৰ সমৰ্থনত স্থিতি স্পষ্ট কৰি থকাৰ পাছতো চৰকাৰৰ মিত্ৰদল অসম গণ পৰিষদে এতিয়াও স্থিতি স্পষ্ট কৰিব পৰা নাই বুলি মন্তব্য কৰে।
বিজেপিয়ে ৰাজনৈতিক মুনাফা লাভৰ বাবে বাংলাভাষী আৰু অসমীয়া লোকৰ মাজত বিভাজন অনাৰ চেষ্টা চলাই থকা বুলিও দেৱব্ৰত শইকীয়াই মন্তব্য কৰে।
তেওঁ কয়, ‘’একাংশ আলোচনাপন্থী আলফা আৰু কিছু বাংলাভাষী হিন্দু বিধায়ক তথা জাতীয়তাবাদী নেতাই কিছুমান বিভেদকামী অশোভনীয় মন্তব্য ৰাজহুৱাভাৱে দি অনাগত দিনত ভয়ংকৰ পৰিস্থিতিৰ সুচনা কৰিব। কিন্তু এনে কাৰ্য দেখিও নেদেখাৰ, শুনিও নুশুনাৰ ভাও জুৰি সোণোৱাল চৰকাৰে সাপ হৈ খুটি সময়ত বেজ হৈ জাৰি ভোট বোটলাৰ চিন্তাত আছে।‘’
ইপিনে, নাগৰিকত্ব সংশোধনী বিধেয়কখন সন্দৰ্ভত বৰাকৰ কংগ্ৰেছ সাংসদ সুষ্মিতা দেব আৰু বিধায়ক কমলাক্ষ দে পুৰকায়স্থৰ মন্তব্য তেওঁলোকৰ ব্যক্তিগত মন্তব্য বুলি কৈ সেয়া দলৰ মন্তব্য নহয় বুলি কয়।
‘’তেওঁলোক দলৰ মুখপাত্ৰ নহয়, মুখপাত্ৰই ক’লেহে দলৰ মন্তব্য হ’ব। ইতিমধ্যে কংগ্ৰেছ ৱৰ্কিং কমিটিত অসম চুক্তি ৰূপায়ণৰ দাবী আৰু নাগৰিকত্ব সংশোধনী বিধেয়কৰ বিৰোধিতা কৰাৰ সিদ্ধান্ত গ্ৰহণ কৰা হৈছে,’’- শইকীয়াই কয়।
ইয়াৰ উপৰি ৰাষ্ট্ৰীয় নাগৰিকপঞ্জী সন্দৰ্ভত বিৰোধী দলপতিজনে বহু প্ৰকৃত ভাৰতীয় নাগৰিকৰ নাম বাদ পৰাৰ দাবী কৰাৰ লগতে সেই লোকসকলে ১৯৭১ চনৰ আগৰ নথি থকাৰ পাছতো এতিয়া হাহাকাৰ কৰিবলগীয়া হৈছে বুলি মন্তব্য কৰে।
তেওঁ লগতে এন আৰ চিৰ ৰাজ্যিক সমন্বয়ক প্ৰতীক হাজেলাই এন আৰ চিৰ প্ৰক্ৰিয়াটোৰ পৰা পাঁচ প্ৰকাৰৰ নথি বাদ দিয়াৰ কাৰণে কিছুমান মনে সজা যুক্তি দাঙি ধৰা বুলিও কয়।
