আগৰখন খেলত শেষ ৩ মিনিটত দুটাকৈ গ’ল দি পৰাজয়ক জয়লৈ সলনি কৰি দিয়া নৰ্থ-ইষ্ট য়ুনাইটেডে আজিও পুনৰ জয়ৰ ধাৰাত খোজ দিয়ে। পুনেত হোৱা আই এছ এলৰ আজিৰ এখন খেলত দলটোৱে আজি পুনেক ২-০ গ’লত হৰুৱায়।
দলটোৰ আজিৰ খেলতো সন্মুখৰ পৰা নেতৃত্ব দিয়া অধিনায়ক বাৰ্থলমিউ অগবেছেই (Bartholomew Ogbeche)ই মূল ভূমিকা লয়। বাৰ্থলমিউ অগবেছেই ২৩ মিনিটতে দিয়া গ’লেৰে দলটোৱে অগ্ৰতি লাভ কৰে আৰু সেই অগ্ৰগতি শেষলৈকে ধৰি ৰাখে।
আনহাতে অতিৰিক্ত সময়ৰ প্ৰথম মিনিটত পেনাল্টি কিকৰ সুবিধা পোৱাত তাক গ’ললৈ ৰূপান্তৰ কৰে জুৱান ক্ৰুজে। ফলত ফলাফল ২-০ হয়। আমোদজনকভাৱে, পূৰ্বৰ খেলখনতো বাৰ্থলমিউ অগবেছেৰ লগতে জুৱান ক্ৰুজেও গ’ল দিছিল। বাৰ্থলমিউ অগবেছেই পেনাল্টি কিকৰ জৰিয়তে আৰু জুৱান ক্ৰুজে পোনপটীয়া শ্বটেৰে গ’ল দিছিল, যিটো আজি ওলোটা হয়।
আজিৰ জয়ৰ জৰিয়তে গুৰুত্বপূৰ্ণ ৩ পইণ্ট অৰ্জন কৰি দলটোৱে তালিকাৰ দ্বিতীয় স্থানলৈ নিজৰ অৱস্থান উন্নীত কৰে। এতিয়া নৰ্থ-ইষ্ট য়ুনাইটেডৰ আগত আছে কেৱল বাংগালুৰু এফ চি, যাৰ পইণ্ট হ’ল ৭খন খেলত ১৯। নৰ্থ-ইষ্ট য়ুনাইটেডৰ ৮খন খেলত পইণ্ট হ’ল ১৭। নৰ্থ-ইষ্ট য়ুনাইটেডৰ পিছতে ৮খন খেলত ১৬ পইণ্টেৰে গোৱা তৃতীয় স্থানত আছে।
নৰ্থ-ইষ্ট য়ুনাইটেডে এতিয়ালৈকে খেলা ৮খন খেলৰ ৫খনত জয়ী হৈছে। দলটোৱে ২ খনত ড্ৰ আৰু মাত্ৰ ১খনত পৰাজিত হৈছে।
