গুৱাহাটীৰ বৰ্ষাপাৰা ষ্টেডিয়ামত অসম-হাৰিয়ানাৰ মাজত অনুষ্ঠিত হোৱা ৰঞ্জি ট্ৰফীৰ এলিট গ্ৰুপ ‘চি’ৰ মেচখনত ইনিংছ ব্যৱধানত জয়ী হয় ঘৰুৱা দল অসম। প্ৰথম ইনিংছত অসমে কৰা ৩১০ ৰানৰ প্ৰত্যুত্তৰত আলহী দলটোৱে ঘৰুৱা বলাৰৰ আগত তিষ্ঠিব নোৱাৰি প্ৰথম ইনিংছত মাত্ৰ ৯৭ ৰান আৰু দ্বিতীয় ইনিংছত ১৭৮ ৰানত অল আউট হয়।
আলহী দলটোৰ বেটিং খহনীয়াৰ মূল কাৰণ আছিল অসমৰ অৰূপ দাস। অৰূপে দুৰ্দান্ত বলিঙেৰে ৫২ ৰান খৰছ কৰি প্ৰথম ইনিংছত সৰ্বাধিক পাঁচটা, ৰঞ্জিত মালীয়ে ২৫ ৰানত তিনিটা আৰু মুখতাৰ হুছেইনে দুটা উইকেট দখল কৰে। আনহাতে দ্বিতীয় ইনিংছতো অৰূপে পাঁচটা, ৰঞ্জিত মালীয়ে তিনিটা আৰু মুখতাৰ হুছেইনে দুটা উইকেট লাভ কৰিবলৈ সক্ষম হয়।
উল্লেখ্য যে হাৰিয়ানাই ফল’অন খোৱাত অসমে পুনৰ আলহী দলটোক বেটিং কৰিবলৈ আমন্ত্ৰণ জনাইছিল। বেটিঙৰ আমন্ত্ৰণ পাই হাৰিয়ানাই প্ৰথম ইনিংছৰ ব্যৰ্থতাক পাহৰি দ্বিতীয় ইনিংছ আৰম্ভ কৰে যদিও পুনৰ দলটোক বেকফুটলৈ ঠেলি দিয়ে অৰূপ দাসে। অৰূপৰ বলিঙৰ আগত তিষ্ঠিব নোৱাৰি পুনৰ তাচপাতৰ দৰে খহে হাৰিয়ানাৰ উইকেট।
ফটো : যুবি
দ্বিতীয় দিনাৰ খেলৰ অন্তলৈকে আলহী দলটোৱে সাতটা উইকেটৰ বিনিময়ত সংগ্ৰহ কৰিছিল ৭৮ ৰান। ১৩৫ ৰানত পিছ পৰি থকা হাৰিয়ানাই তৃতীয় দিনাৰ খেল আৰম্ভ কৰি ১৭৮ ৰানতে দ্বিতীয় ইনিংছ সামৰে। আৰু এইদৰে অসমে মেচখন এক ইনিংছ আৰু ৩৫ ৰানৰ ব্যৱধানত জয়ী হয়।
অসমৰ বলাৰৰ দুৰ্দান্ত প্ৰদৰ্শনৰ বাবেই হাৰিয়ানাৰ দৰে অভিজ্ঞ খেলুৱৈৰে সমৃদ্ধ দলক ইনিংছ ব্যৱধানত পৰাস্ত কৰিবলৈ সক্ষম হয়। তদুপৰি আঘাতৰ সমস্যাৰ পৰা মুক্ত হৈ দললৈ উভতা গকুল শৰ্মাৰ বেটিং প্ৰদৰ্শনো আছিল উল্লেখণীয়। মেচখনত গকুলে ৯৬ ৰানৰ এক গুৰুত্বপূৰ্ণ ইনিংছ খেলে যাৰ ফলত অসমে প্ৰথম ইনিংছত ৩১০ ৰান সংগ্ৰহ কৰিবলৈ সক্ষম হৈছিল।
