অহা ৩১ জানুৱাৰিৰ পৰা চাৰিদিনীয়া কাৰ্যসূচীৰে নগাঁও জিলাৰ ৰহাত অনু্ষ্ঠিত হ’বলগীয়া অসম সাহিত্য সভাৰ দশম বিশেষ বাৰ্ষিক ৰহা অধিৱেশন উপলক্ষে অসম সাহিত্য সভাৰ কেন্দ্ৰীয় সমিতি আৰু আদৰণি সমিতিৰ মাজত এক চুক্তি সম্পাদিত হয়।
অসম সাহিত্য সভাৰ নগাঁও আঞ্চলিক কাৰ্যালয় লাল চান্দ টোডী প্ৰেক্ষাগৃহত সভাৰ সভাপতি ডঃ পৰমানন্দ ৰাজবংশীৰ সভাপতিত্বত অনুষ্ঠিত চুক্তি সম্পাদন কাৰ্যসূচীত চুক্তিপত্ৰত স্বাক্ষৰ কৰে অসম সাহিত্য সভাৰ প্ৰধান সম্পাদক পদুম ৰাজখোৱা আৰু আদৰণি সমিতিৰ সাধাৰণ সম্পাদিকা বিনু লস্কৰ ঠাকুৰীয়াই।
অনুষ্ঠানত অংশ গ্ৰহণ কৰা অসম সাহিত্য সভাৰ সভাপতি ড০ পৰমানন্দ ৰাজবংশীয়ে সাংবাদিকৰ আগত কয় যে এই অধিবেশনখনে অসমৰ জাতীয় জীৱনৰ বহু কেইটা দিশক গতি প্ৰদান কৰিব। তেওঁ কয় যে অধিৱেশনলৈ চৰকাৰী পক্ষৰ লগতে বিভিন্ন দল-সংগঠনৰ নেতৃবৃন্দক আমন্ত্ৰণ কৰা হ’ব। সেই অনুষ্ঠানতে আমি একেলগে কথা ৰাষ্ট্ৰীয় নাগৰিক পঞ্জীকে ধৰি বিভিন্ন দিশৰ ওপৰত আলোচনা কৰিম।
সাংবাদিকে সোধা প্ৰশ্নৰ উত্তৰত তেওঁ লগতে কয় যে ৰাষ্ট্ৰীয় নাগৰিক পঞ্জীৰ পূৰ্ণাংগ তালিকা ওলোৱাৰ পিচত যি সকল বিদেশী বুলি চিনাক্ত কৰা হ’ব তেওঁলোকক প্ৰত্যৰ্পণ কৰিবই লাগিব। ডঃ ৰাজবংশীয়ে নাগৰিকত্ব সংশোধনী বিধেয়কৰ প্ৰসংগত অসম সাহিত্য সভাৰ স্থিতি স্পষ্ট বুলি কয়। তেওঁ লগতে কয় যে এই বিধেয়কখনৰ প্ৰসংগত অসমৰ জনসাধাৰণ যি পক্ষত আছে আমি সেই পক্ষতে দৃঢ়ভাবে থাকিম।
অসম সাহিত্য সভাৰ প্ৰধান সম্পাদক পদুম ৰাজখোৱাই সাংবাদিকক কয় যে অধিৱেশনলৈ বহু কেইজন ৰাষ্ট্ৰীয় পৰ্যায়ৰ চিন্তাবিদ, গৱেষক আহিব। সভাত অসম সাহিত্য সভাৰ প্ৰাক্তন ভাৰপ্ৰাপ্ত সম্পাদক অৱনী মোহন চহৰীয়া, ধন ভঁড়ালী কনক কুমাৰ বৰা, গুৱাহাটী কাৰ্যালয়ৰ সম্পাদক ডঃ সঞ্জীৱ কুমাৰ শৰ্মা, মংগলদৈ কাৰ্যালয়ৰ সম্পাদক শৈলেন কুমাৰ ৰাজবংশী, নগাঁও কাৰ্যালয়ৰ সম্পাদক যতীন্দ্ৰ নাথ সুত, সাহিত্য অকাডেমী বটা প্ৰাপ্ত বিপুল দেউৰীকে ধৰি নগাঁও জিলা সাহিত্য সভাৰ বিষয়ববীয়া আৰু ৰহা আদৰণি সমিতিৰ কাৰ্যকৰী সভাপতি কমল চন্দ্ৰ শৰ্মা তথা আন বিষয়ববীয়া উপস্থিত থাকে।
