বাংলাদেশৰ প্ৰাক্তন প্ৰধানমন্ত্ৰী তথা বাংলাদেশ জাতীয় দলৰ (বিএনপি) অধ্যক্ষা বেগম খালেদা জিয়াই অহা ৩০ ডিচেম্বৰত অনুষ্ঠিত হ’বলগীয়া সাধাৰণ নিৰ্বাচনত প্ৰতিদ্বন্দ্বিতা কৰিব পাৰিবনে নাই সেইটো বাংলাদেশৰ উচ্চ ন্যায়ালয়ে আজি নিৰ্ণয় কৰিব। উল্লেখ্য যে জিয়া বৰ্তমান দুৰ্নীতিৰ গোচৰত কাৰাবাস খাটি আছে।
বিএনপিৰ নেত্ৰীগৰাকীয়ে তিনিটা সংসদীয় সমষ্টিৰ পৰা দাখিল কৰা মনোনয়ন খাৰিজ কৰাৰ পাছত নিৰ্বাচন আয়োগক প্ৰত্যাহ্বান জনাই আদালতত দাখিল কৰা আৱেদনৰ শুনানি সোমবাৰে আদালতে গ্ৰহণ কৰে।
ন্যায়াধীশ চৈয়দ ৰেফাট আহমেদ আৰু ন্যায়াধীশ মহম্মদ ইকবাল কবীৰে এই বিষয়ত সিদ্ধান্ত ঘোষণা কৰিব।
বিএনপিয়ে বেগম খালেদাক ফেনা-১, বহুৰা-৬ আৰু বগুৰা-৭ এই তিনিটা সমষ্টিৰ পৰা প্ৰাৰ্থী হিচাপে মনোনীত কৰিছিল। দলৰ নেতাসকলে তেওঁৰ হৈ প্ৰয়োজনীয় আৱেদন দাখিল কৰিছিল।
যোৱা ২ ডিচেম্বৰত নিৰ্বাচনী বিষয়াগৰাকীয়ে তেওঁ কাৰাবাস খাটি থকাৰ কথা উল্লেখ কৰি মনোনয়ন খাৰিজ কৰিছিল। খালেদাই এই সিদ্ধান্তৰ বিৰুদ্ধে নিৰ্বাচন আয়োগত আৱেদন কৰিছিল যদিও তেওঁৰ আৱেদন প্ৰত্যাখ্যান কৰে।
ইয়াৰ পাছতে বিএনপিৰ অধ্যক্ষাগৰাকীয়ে বিষয়টো উচ্চ ন্যায়ালয়লৈ লৈ যায়। শুনানিত খালেদাৰ পক্ষৰ হৈ যুক্তি দাঙি ধৰে প্ৰাক্তন এটৰ্ণি জেনেৰেল এ জে মহম্মদ আলীয়ে। আনহাতে, চৰকাৰক প্ৰতিনিধি কৰে ইয়াৰ এটৰ্ণি জেনেৰেল মহবুবে আলমে।
খালেদাৰ আইনী পৰামৰ্শদাতা গোটৰ এগৰাকী সদস্য কেইছৰ কামালে সংবাদ মাধ্যমৰ আগত কয়, ‘’ আমি আশা কৰিছো বেগম খালেদা জিয়াই ন্যায় পাব আৰু জনসাধাৰণৰ ইচ্ছা অনুসৰি নিৰ্বাচনত প্ৰতিদ্বন্দ্বিতা কৰিবলৈ সক্ষম হ’ব।‘’
সোমবাৰে শুনানিৰ সময়ত য়ুৰোপীয়ান য়ুনিয়নৰ ‘নিৰ্বাচন বিশেষজ্ঞ অভিযান’ৰ আইনবিদ ইৰিনি-মাৰিয়া গৌনাৰিও উপস্থিত আছিল। আদালতৰ শেষৰ শাৰীত তেওঁ থিয় হৈ আছিল। ন্যায়াধীশ চৈয়দ ৰেফাট আহমেদে তেওঁলৈ লক্ষ্য কৰিছিল আৰু তেওঁক শেষৰ পিনে বহাৰ ব্যৱস্থা কৰি দিছিল। তেওঁৰ আদালতৰ কাৰ্য বিৱৰণী লিখি যোৱা দেখা গৈছিল।
