‘১১ ডিচেম্বৰত ঘোষিত পাঁচৰাজ্যৰ বিধানসভাৰ নিৰ্বাচনী ফলাফলে ভাৰতীয় জনতা পাৰ্টীৰ ভ্ৰষ্টাচাৰী আৰু কুশাসনৰ স্বৰূপ উদঙাই দিছে। কেন্দ্ৰ আৰু ৰাজ্যত থকা বিজেপি নেতৃত্বাধীন চৰকাৰৰ স্বৈৰাচাৰীৰ বাবেই ৰাজ্য কেইখনৰ সাধাৰণ জনতাই বিজেপিক সম্পূৰ্ণৰূপে প্ৰত্যাখ্যান কৰিলে’। ১৩ ডিচেম্বৰ অৰ্থাৎ বৃহস্পতিবাৰে এই মন্তব্য কৰে প্ৰবীণ বাঁওপন্থী নেতা তথা ত্ৰিপুৰাৰ প্ৰাক্তন মুখ্য মন্ত্ৰী মানিক সৰকাৰে।
ত্ৰিপুৰা বিধানসভাৰ বৰ্তমানৰ বিৰোধী দলপতি মানিক সৰকাৰে বিজেপিৰ পৰাজয়ৰ প্ৰসংগত আৰু কয় যে অহা বছৰ দেশত অনুষ্ঠিত হ’বলগীয়া সাধাৰণ নিৰ্বাচনতো এণ্টি বিজেপি ঢৌ দেখা পোৱা যাব।
তেওঁ লগতে কয়, ‘প্ৰতিষ্ঠানবিৰোধী ঢৌৰ বাবে মিজোৰামত কংগ্ৰেছ পৰাস্ত হ’বলগীয়া হ’ল। কিন্তু মিজোৰামক বাদ দি উত্তৰ-পূবৰ আন ৰাজ্য কেইখনত বিজেপিয়ে ধনবল, সংবাদ মাধ্যমক ব্যৱহাৰ কৰাৰ লগতে ৰাইজক মিছা প্ৰতিশ্ৰুতি দি শাসনত আহিছে’।
ইয়াৰ উপৰি চি পি আই(এম)ৰ আন এগৰাকী বৰ্ষিয়ান নেতা তথা ইষ্ট ত্ৰিপুৰাৰ সাংসদ জিতেন্দ্ৰ চৌধুৰীয়ে বিজেপিৰ পৰাজয় প্ৰসংগত কয় যে ৰাজস্থান, মধ্য প্ৰদেশ আৰু ছত্তীশগড়ত বিজেপিৰ পৰাজয়ে বিৰোধী শিবিৰসমূহক এক নতুন মাত্ৰা প্ৰদান কৰিছে। লগতে অহা বছৰ অনুষ্ঠিত হ’বলগীয়া সাধাৰণ নিৰ্বাচনৰ আগে আগে বিৰোধী শিবিৰসমূহ একত্ৰিত হোৱাৰো সুযোগ লাভ কৰা বুলি সাংসদ চৌধুৰীয়ে মন্তব্য কৰে।
