১৫ ডিচেম্বৰত মোম্বাইত ‘ফিল্ম ক্ৰিটিকচ গিল্ড অব ইণ্ডিয়া’ নামৰ ভাৰতৰ অন্যতম সংগঠনটোৱে আয়োজন কৰা ২০১৮ চনৰ চুটি বোলছবি মহোৎসৱত বিশ্বনাথৰ যুৱ প্ৰযোজক আৰু পৰিচালক ভাৰ্গৱে শ্ৰেষ্ঠ চিনেমেত’ গ্ৰাফী আৰু শ্ৰেষ্ঠ সংগীত পৰিচালকৰ বঁটা লাভ কৰে।
উল্লেখযোগ্য যে চুটি বোলছবি মহোৎসৱত প্ৰখ্যাত গল্প লিখক ৰাক্সিন বণ্ডৰ শিশু সূলভ চিন্তাৰে পুষ্ট কাহিনীৰ আধাৰত নিৰ্মিত ভাৰ্গৱৰ চুটি বোলছবি ‘দ্য ব্লেক কেটে’ শ্ৰেষ্ঠ চিনেমেত’ গ্ৰাফী আৰু শ্ৰেষ্ঠ সংগীত পৰিচালকৰ বঁটা লাভ কৰি বিশ্বনাথৰ লগতে সমগ্ৰ অসমলৈ গৌৰৱ কঢ়িয়াই আনিবলৈ সক্ষম হৈছে।
বলিউডৰ খ্যাতনামা অভিনেতা প্ৰয়াত টম আল্টাৰ আৰু স্নেহাজ পাটিল অভিনীত আৰু ভাৰ্গৱৰ দ্বাৰা প্ৰযোজিত আৰু পৰিচালিত ‘দ্য ব্লেক কেটে’ ইতিমধ্যে বিদেশৰ কেইবাখনো আন্তঃৰাষ্ট্ৰীয় বোলছবি মহোৎসৱত সমাদৃত হোৱাৰ লগতে বিভিন্ন শিতানত কেইবাটাও বঁটা লাভ কৰিবলৈ সক্ষম হৈছে।
পূৰ্বতে ‘দ্য এৱেকিনিঙচ’ নামৰ ভাৰ্গৱৰ হিন্দী ভাষাত নিৰ্মিত ভৌতিক চুটি বোলছবিখন ১৯০ খন দেশত প্ৰদৰ্শন হোৱাৰ লগতে বিভিন্ন শিতানত ৩৪ টা শ্ৰেষ্ঠত্বৰ বঁটা লাভ কৰি দেশ-বিদেশৰ বোলছবি জগতত ছুনামিৰ সৃষ্টি কৰিছিল।
শেহতীয়াকৈ ভাৰ্গৱৰ ‘দ্য অৰ্ডিয়েণ্ট’ নামৰ প্ৰথম হিন্দী ভৌতিক পূৰ্ণাংগ বোলছবিখনৰ কামকাজ আৰম্ভ হৈছে। স্মৰ্তব্য যে ‘দ্য অৰ্ডিয়েণ্ট’ৰ গোটেই প্ৰকল্পটো ২০১৮ চনৰ জুলাই মাহত চাউথ কুৰিয়াত অনুষ্ঠিত ‘এছিয়ান ফেণ্টাষ্টিক ফিল্ম ক’প্ৰডাকচন মাৰ্কেটত’ আমন্ত্ৰণ লাভ কৰি বোলছবি জগতত পাৰম্ভিকভাৱে চমকৰ সৃষ্টি কৰিছিল।
