বুধবাৰে বহা নৰেন্দ্ৰ মোদী কেবিনেটে অসম চুক্তিৰ ৬নং দফা কাৰ্য্যকৰীকৰণৰ বাবে এখন উচ্চস্তৰীয় সমিতি গঠনৰ সিদ্ধান্ত লৈছে।
“সমিতিয়ে সকলো অংশীদাৰৰে সৈতে আলোচনা কৰিব আৰু অসম বিধান সভা আৰু স্থানীয় নিকায়সমূহত অসমীয়া লোকৰ বাবে প্ৰয়োজনীয় পৰিমাণৰ আসন সংৰক্ষণ সন্দৰ্ভত পৰ্য্যালোচনা কৰিব। অসমীয়াকে ধৰি অসমৰ আন খিলঞ্জীয়া ভাষাসমূহৰ সুৰক্ষাৰ প্ৰয়োজনীয়তা, অসম চৰকাৰৰ চাকৰিত সংৰক্ষণৰ পৰিমাণ আৰু অসমীয়া মানুহৰ সাংস্কৃতিক, সামাজিক, ভাষিক পৰিচয় আৰু ঐতিহ্যৰ সুৰক্ষা, সংৰক্ষণ আৰু প্ৰসাৰৰ বাবে আন ব্যৱস্থা সন্দৰ্ভতো সমিতিখনে পৰ্য্যালোচনা কৰিব,” পি আই বিৰ বিবৃতিত প্ৰকাশ।
সমিতিখনৰ গঠন আৰু চৰ্তসমূহ নিৰ্ধাৰণ কৰিব কেন্দ্ৰীয় গৃ্হ মন্ত্ৰ্যালয়ে।
বড়ো সংগঠনৰ সৈতে ২০০৩ চনত স্বাক্ষৰিত বুজাবুজি চুক্তি ৰূপায়নৰ ব্যৱস্থাৰো অনুমোদন জনাইছে মোদী কেবিনেটে।
কোকৰাঝাৰত এটা বড়ো সংগ্ৰহালয় তথা ভাষা আৰু সাংস্কৃতিক কেন্দ্ৰ স্থাপন, ইতিমধ্যে থকা অনাতাঁৰ আৰু দূৰদৰ্শন কেন্দ্ৰ দুটাৰ আধুনিকীকৰণ আৰু বিটিএদিৰ মাজেৰে যোৱা দ্ৰুতবেগী ৰে’ল এখনৰ নাম আৰনাই এক্সপ্ৰেছ ৰখাৰ বাবে কেন্দ্ৰই সিদ্ধান্ত লৈছে।
অসম চুক্তিৰ ৩৫ বছৰ পিছত লোকসভা নিৰ্বাচনৰ সন্মুখত পৰ্য্যালোচনাৰ বাবে সমিতি গঠনক লৈ আছুকে ধৰি অসমৰ বিভিন্ন দল-সংগঠন মোদী চৰকাৰৰ সমালোচনাত মুখৰ হৈ উঠিছে।
