নাগৰিকত্ব সংশোধনী বিধেয়কখনৰ ব্যাপক বিৰোধিতাৰ মাজেৰে অসম্প্ৰদায়িক চৰিত্ৰ প্ৰদৰ্শন কৰা অসমীয়াসকলক আজি অহা সংকটৰ সময়ত গুৰু দুজনাৰ আদৰ্শেৰে অনুপ্ৰাণিত হৈ একত্ৰিত হ’বলৈ আহ্বান জনাইছে শ্ৰীমন্ত শংকৰদেৱ যুৱ মঞ্চই। শ্ৰীমন্ত শংকৰদেৱ যুৱ মঞ্চই আজি এটা বিজ্ঞপ্তিৰ জৰিয়তে সকলো ভকত-বৈষ্ণৱ এই আহ্বান জনায়৷
“মহাপুৰুষ শ্ৰীমন্ত শংকৰদেৱ, মাধৱদেৱ, দামোদৰদেৱ, হৰিদেৱ আৰু কুৰিজন আতা পুৰুষে বৰ অসমৰ ভাষা, সাহিত্য, সংস্কৃতি, আধ্যাত্মিক ক্ষেত্ৰত বলিষ্ঠ ভূমিকা গ্ৰহণ কৰি বিভিন্ন জাতি-জনগোষ্ঠীক সামাজিকভাৱে সত্ৰ, নামঘৰৰ মজিয়াত একত্ৰিত কৰি বৃহত্তৰ অসমীয়া জাতিৰ বুনিয়াদ নিৰ্মাণ কৰিছিল৷ সেইখন বৰ অসমত আজি খিলঞ্জীয়া জাতি জনগোষ্ঠীৰ প্ৰতি ভয়াৱহ সংকট নমাই অনা বিতৰ্কিত নাগৰিকত্ব সংশোধনী বিধেয়কখন জাপি অসমীয়া জাতিৰ মূল পৰিকাঠাম ভাঙি পেলাবলৈ ভয়াৱহ ষড়যন্ত্ৰ কৰিছে৷” এইদৰে কোৱা হয় বিজ্ঞপ্তিটোত।
শ্ৰীমন্ত শংকৰদেৱ যুৱ মঞ্চই এই ষড়যন্ত্ৰ উৎখাত কৰিব লাগিব বুলি উল্লেখ কৰি কয়, “এই ষড়যন্ত্ৰ উৎখাত কৰিবলৈ সকলো মহাপুৰুষীয়া আদৰ্শত বিশ্বাসী ভকত-বৈষ্ণৱ, আইমাতৃ একগোট হ’ব লাগিব৷ সত্ৰ, নামঘৰৰ মজিয়াত দবা. শংখ, তাল বজাই, চাকি জ্বলাই মেজিৰ সন্মুখত ভোগালী বিহুৰ দিনা অসমীয়া জাতিয়ে একত্ৰিত হৈ সংকল্প গ্ৰহণ কৰক৷”
“জাতি থাকিলেহে শংকৰ-মাধৱৰ সংস্কৃতি আদৰ্শ, দৰ্শন জীয়াই থাকিব৷” বুলি তাৎপৰ্য্যপূৰ্ণ অভিমত আগ বঢ়ায় মহাপুৰুষীয়া আদৰ্শত বিশ্বাসী যুৱ মঞ্চটোৱে।
যুৱ মঞ্চৰ কাৰ্যকৰী সভাপতি দীপজ্যোতি চহৰীয়া আৰু সাধাৰাণ সম্পাদক অপূৰ্ব অধিকাৰীয়ে স্বাক্ষৰ কৰা বিবৃতিটোত চৰকাৰৰ প্ৰতিও আছে আহ্বান।
গণতান্ত্ৰিকভাৱে নিৰ্বাচিত দিচপুৰৰ চৰকাৰে অসমবাসীৰ আৱেগ-অনুভূতিক গুৰুত্ব প্ৰদান কৰি এই আহ্বানবোৰ গ্ৰহণ কৰিবলৈ কয় বিবৃতিটোত। “জগত গুৰু শংকৰদেৱৰ দ্বাৰা সৃষ্ট ভাষা-সাহিত্য-সংস্কৃতিৰ সুৰক্ষাৰ স্বাৰ্থত আৰু ৯২৬খন সত্ৰ, ৪০হাজাৰ নামঘৰ সুৰক্ষাৰ বাবে অনতিপলমে শংকৰদেৱ সঞ্চালকালয় স্থাপন, অসমৰ থলুৱা সংস্কৃতি বৰগীত, সত্ৰীয়া নৃত্য, ভোৰতাল নৃত্য, লোকগীত, বিহু, জনগোষ্ঠীয় নৃত্য চৰ্চা বিকাশৰ বাবে অসমৰ ১২৬টা সমষ্টিত শংকৰ-মাধৱ সাংস্কৃতিক বিকাশ কেন্দ্ৰ স্থাপন, সত্ৰৰ ভূমি বেদখল মুক্ত, ৰজাদিনীয়া সম্পদ ৰাজসভা, নামদাং শিলৰ সাঁকো, ধোদৰআলি, গোসাঁই কমল আলি, অসুৰআলি, আজান পীৰৰ স’ৰাগুৰি চাপৰিকে ধৰি ঐতিহাসিক বয়বস্তুসমূহ সুৰক্ষাৰ ক্ষেত্ৰত ব্যৱস্থা, অসমীয়া মাতৃভাষাক বৰাক-ব্ৰহ্মপুত্ৰ উপত্যকাত অচিৰেই চৰকাৰী কাৰ্যালয়, বিদ্যালয়ত বাধ্যতামূলক কৰাৰ ব্যৱস্থা গ্ৰহণ কৰিবলৈ ৰাজ্যৰ মুখ্য মন্ত্ৰী সোণোৱাল আৰু হিমন্ত বিশ্ব শৰ্মাই হাতে কামে কাৰ্যকৰী পদক্ষেপ গ্ৰহণ কৰক”। এইদৰে আহ্বান জনায় বিবৃতিটোত।
বিবৃতিটোত স্পষ্টকৈ কয়, “বহিঃৰাষ্ট্ৰৰ পৰা হিন্দু বঙালীয়ে আহি অসমীয়া জাতিক বচাব নোৱাৰে”
উল্লেখযোগ্য যে নাগৰিকত্ব সংশোধনী বিধেয়কখনৰ বিৰোধিতাত অসমৰ নাগৰিকৰ সৰ্বাত্মক আন্দোলন আৰু প্ৰতিবাদ দেখিয়েই শ্ৰীমন্ত শংকৰদেৱ সংঘয়ো যোৱা ১৩ জানুৱাৰিত আগন্তুক অধিৱেশনলৈ নিমন্ত্ৰিত অতিথি প্ৰধান মন্ত্ৰী মোদীক ‘নহাটোৱেই বিচাৰো’ বুলি কৈছিল। মহাপুৰুষীয়া উদাৰনৈতিক আদৰ্শত বিশ্বাসী অসমীয়া সমাজত ধৰ্মৰ বিভাজন সিঁচিব খোজা শক্তিৰ বিৰুদ্ধে এই আদৰ্শক অন্তৰত ঠাই দি থকাসকলৰ এই শেহতীয়া বিদ্ৰোহ মন কৰিব লগীয়া।
