নাগৰিকত্ব সংশোধনী বিধেয়ক প্ৰসংগত বিভিন্ন ৰাজনৈতিক দল-সংগঠনে তীব্ৰ প্ৰতিবাদ সাব্যস্ত কৰি থকাৰ সময়তে মণিপুৰৰ মুখ্য মন্ত্ৰী এন বীৰেন সিঙে বহু বিতৰ্কিত বিধেয়কখনৰ ওপৰত আলোচনা কৰাৰ উদ্দেশ্যে অহা ২৮ জানুৱাৰিত এখন সৰ্বদলীয় বৈঠকৰ আহ্বান জনাইছে।
উল্লেখ্য যে এই বিধেয়কৰ ওপৰত আলোচনা কৰাৰ উদ্দেশ্যে কংগ্ৰেছে বিধানসভাৰ বিশেষ অধিৱেশনৰ বাবে অনুৰোধ জনাই ৰাজ্যপাল নাজমা হেপতুল্লাক এখন স্মাৰক পত্ৰ প্ৰদান কৰিছিল। কংগ্ৰেছে গ্ৰহণ কৰা এনে স্থিতিৰ প্ৰতি লক্ষ্য ৰাখিয়েই মুখ্য মন্ত্ৰী সিঙে উক্ত সৰ্বদলীয় বৈঠকৰ আয়োজন কৰা হৈছে। টাইমছ অব ইণ্ডিয়াৰ এক বাতৰিত এই কথা প্ৰকাশ পাইছে।
ইফালে নৰ্থ-ইষ্ট ইণ্ডিয়া ডেভ’লপমেণ্ট পাৰ্টী (এন ই আই ডি পি)ৰ নেতা-কৰ্মীসকলে এই বিতৰ্কিত বিধেয়কৰ প্ৰতিবাদত নিজৰ প্ৰাণ বিসৰ্জন দিবলৈও সাজু আছে বুলি এক গুৰুত্বপূৰ্ণ মন্তব্য কৰা দেখা যায়।
এন ই আই ডি পিৰ অধ্যক্ষ নৰেংবাম সমৰজিৎ সিঙে বিধেয়কখন বাতিলৰ দাবী জনোৱাৰ লগতে উত্তৰ-পূবৰ সকলো ৰাজনৈতিক দলকে এই বিধেয়কখনৰ বিৰুদ্ধে স্বাক্ষৰ অভিযান আৰম্ভ কৰিবলৈ আহ্বান জনায়।
দলটোৱে বিধেয়কখন উত্তৰ-পূবৰ বাবে ভাবুকি স্বৰূপ বুলি মত প্ৰকাশ কৰি কয় যে এইখন আইনত পৰিণত হ’লে ইয়াৰ লোকে নিজস্ব স্বকীয়তা, সংস্কৃতিৰ লগতে অৰ্থনৈতিক তথা সামাজিকভাৱে বেয়াকৈ ক্ষতিগ্ৰস্ত হ’ব।
ইফালে মণিপুৰৰ ৬টা ছাত্ৰ সংগঠনে এই বিধেয়কখনৰ বিৰুদ্ধে অহা ৩০ জানুৱাৰিত দেশৰ ৰাজধানী নতুন দিল্লীত প্ৰতিবাদ সাব্যস্ত কৰিব বুলি জনায়।
