নাগৰিকত্ব সংশোধনী বিধেয়ক বাতিলৰ দাবীত আজি ৰাজ্যৰ আন ঠাইৰ লগতে হোজাইত জিলা কৰ্মচাৰী পৰিষদে গ্ৰহণ কৰা অৱস্থান ধৰ্মঘট কাৰ্যসূচীৰ জিলাখনৰ বিভিন্ন কাৰ্য্যালয়ৰ কাম-কাজ স্তব্ধ হৈ পৰে। উপায়ুক্তৰ কাৰ্যালয়ৰ সন্মুখত পুৱা ১১ বজাৰ পৰা দিনৰ ২ বজালৈকে এই অৱস্থান ধৰ্মঘট কাৰ্যসূচীত ৰূপায়ণ কৰা হয়।
প্ৰতিবাদস্থলীত হোজাই জিলাৰ প্ৰায় ৩ শতাধিক কৰ্মচাৰী উপস্থিত আছিল। কৰ্মচাৰী পৰিষদে ধৰ্মঘটস্থলীত অসম চুক্তিৰ অৱমাননা নচলিব, জাতিধ্বংসী বিধেয়ক বাতিল কৰক, ধৰ্মক লৈ ৰাজনীতি নকৰি নাগৰিকত্ব সংশোধনী বিধেয়ক বাতিল কৰক আদি শ্ল’গানেৰে পৰিবেশ উত্তাল কৰি তোলে।
হোজাই জিলা কৰ্মচাৰী পৰিষদৰ সভাপতি জামাল আহমেদে কয়, ‘অসমৰ জাতীয় স্বাৰ্থৰ পৰিপন্থী প্ৰস্তাৱিত জাতিধ্বংসী নাগৰিকত্ব সংশোধনী বিধেয়ক আইনখন চৰকাৰে বাতিল কৰিব লাগে। অসমৰ প্ৰতিটো দল-সংগঠনৰ লগতে আমিও ইয়াৰ তীব্ৰ বিৰোধীতা কৰিছো।’
এই ধৰ্মঘটত সদৌ অসম কৰ্মচাৰী পৰিষদৰ উপদেষ্টা অনুপ বৰঠাকুৰ, হোজাই জিলা কৰ্মচাৰী পৰিষদৰ সভাপতি জামাল আহমেদকে ধৰি কৰ্মচাৰী পৰিষদৰ বহুকেইটা ভাতৃ সংগঠনৰ বিষয়া-কৰ্মচাৰীসকল উপস্থিত থাকে।
উল্লেখযোগ্য যে, নাগৰিকত্ব সংশোধনী বিধেয়ক বাতিলৰ দাবীত হোজাই জিলা কৰ্মচাৰী পৰিষদৰ উক্ত ধৰ্মঘটৰ ফলত জিলাখনৰ চৰকাৰী স্কুল ছুটী দিবলগীয়া হোৱাৰ লগতে চৰকাৰী কাৰ্যালয়ৰ কাম কাজবোৰো বন্ধ হৈ পৰে।
প্ৰায় ৩ শতাধিক সদস্যই হোজাইৰ উপায়ুক্ত কাৰ্য্যালয়ৰ সন্মুখত ৰূপায়ন কৰা এই কাৰ্য্যসূচীত প্ৰতিবাদকাৰী সকলে হাতে-হাতে প্লে’কাৰ্ড লৈ চৰকাৰ বিৰোধী শ্ল’গান দি কোনো কাৰনতে বিধেয়কখন মানি লোৱা নহ’ব বুলি সকিয়াই দিয়ে।
