গোৱালপাৰ জিলাৰ দুধনৈৰ ৰাজহুৱা খেলপথাৰত আজি ৰাভা হাছং স্বায়ত্ত শাসিত পৰিষদৰ নৱ নিৰ্বাচিত সদস্যসকলৰ শপত গ্ৰহণ অনুষ্ঠিত হয়। এই উপলক্ষে যৌথ সংগ্ৰাম সমিতিৰ ৩৩ গৰাকী আৰু অগপ, কংগ্ৰেছ আৰু বিজেপিৰ এগৰাকী কৈ মুঠ ৩৬ গৰাকী সদস্যই শপত গ্ৰহণ কৰে।
ৰাভা হাছং স্বায়ত্ত শাসিত পৰিষদৰ মুখ্য কাৰ্যবাহী সদস্য টংকেশ্বৰ ৰাভাৰ অধীনত পুনৰ বাৰ গঠিত হোৱা পৰিষদৰ শপত গ্ৰহণ অনুষ্ঠানত উপস্থিত থাকে মুখ্য মন্ত্ৰী সৰ্বানন্দ সোণোৱাল আৰু বিত্ত, স্বাস্থ্য আৰু গড়কাপ্টানি বিভাগৰ মন্ত্ৰী হিমন্ত বিশ্ব শৰ্মা উপস্থিত থাকে।
অনুষ্ঠানত ভাষণ প্ৰদান কৰি মুখ্য মন্ত্ৰীয়ে কয়, ‘অসম চৰকাৰে ৰাজ্যখনৰ থলুৱা লোকসকলৰ জাতি-মাটি-ভেঁটি, কলা-সংস্কৃতি ৰক্ষা কৰিবলৈ বদ্ধপৰিকৰ আৰু এই ক্ষেত্ৰত কোনো শংকাৰ কাৰণ নাই।‘
আনহাতে মন্ত্ৰী হিমন্ত বিশ্ব শৰ্মাই নিজৰ ভাষণত গোৱালপাৰাত ৰাজ্যৰ দ্বিতীয়খন আয়ুৰ্বেদিক মহাবিদ্যালয় প্ৰতিষ্ঠা কৰা হ’ব বুলি ঘোষণা কৰে। ইয়াৰ উপৰিও ৰাভা হাছং এলেকাৰ বাট-পথৰ উন্নয়ন সাধন কৰিবলৈ শীঘ্ৰে পেকেজ ঘোষণা কৰা হ’ব বুলি তেওঁ কয়।
তেওঁলোকৰ উপৰি আজিৰ এই অনুষ্ঠানত গোৱালপাৰা জিলাৰ উপায়ুক্ত বৰ্ণালী ডেকা, কোঁচ ৰাজবংশী স্বায়ত্ত শাসিত পৰিষদৰ সদস্য কমল ৰায়, বিধায়ক দীপক ৰাভাকে ধৰি গণ্য-মান্য লোকে অংশগ্ৰহণ কৰে।
