গোলাঘাট জিলাত বিষাক্ত সুৰাপান কৰি মৃত্যু হোৱা লোকৰ সংখ্যা ৮০ জনলৈ বৃদ্ধি পাইছে। এতিয়াও বহু লোক সংকটজনক অৱস্থাত চিকিৎসালয়ত ভৰ্তি হৈ আছে। সূত্ৰৰ পৰা লাভ কৰা খবৰ অনুসৰি মৃতকৰ সংখ্যাই ১০০ সংখ্যা অতিক্ৰম কৰাৰ সম্ভাৱনা আছে।
অসুস্থ লোক সকলক গোলাঘাটৰ চহিদ কুশল কোঁৱৰ অসামৰিক চিকিৎসালয়ত আৰু যোৰহাট চিকিৎসালয় তথা চিকিৎসা মহাবিদ্যালয়ত চিকিৎসা প্ৰদান কৰি থকা হৈছে। শুকুৰবাৰে বহুকেইজন লোকৰ চিকিৎসালয় দুখনত মৃত্যু ঘটে।
উল্লেখযোগ্য যে, বৃহস্পতিবাৰে সন্ধিয়া বিষাক্ত সুৰাপান কৰি গুৰুতৰভাবে অসুস্থ হৈ পৰিছিল লোককেইজন। ইতিমধ্যে মুখ্য মন্ত্ৰী সৰ্বনন্দ সোণোৱালে সমগ্ৰ ঘটনাৰ তদন্ত ঘোষণা কৰিছে। ৰাজ্যৰ আবকাৰী বিভাগক ইতিমধ্যে বিশেষ দায়িত্ব অৰ্পন কৰা হৈছে। আবকাৰী মন্ত্ৰী পৰিমল শুক্লবৈদ্যই জনোৱা মতে ইতিমধ্যে কৰ্তব্যত গাফিলতিৰ অপৰাধত দুজন আবকাৰী বিষয়াক নিলম্বন কৰা হৈছে।
আবকাৰী বিভাগৰ চাৰিজনীয়া প্ৰতিনিধি দল এটাই ইতিমধ্যে পৰিস্থিতিৰ প্ৰাথমিক তদন্তৰ বাবে ঘটনাস্থলীত উপস্থিত হৈছে। অসমৰ শক্তিমন্ত্ৰী তপন গগৈ, সাংসদ কামাখ্য প্ৰসাদ তাছা আৰু বিধায়ক মৃণাল শইকীয়াই ঘটনাস্থলীত উপস্থিত হৈ পৰিস্থিতিৰ বুজ লৈছে। মুখ্যমন্ত্ৰীয়ে ঘটনাৰ লগত জড়িত অপৰাধী সকলক চিনাক্ত কৰি কঠোৰ শাস্তি দিয়াৰ বাবে নিৰ্দেশ দিছে।
