ৰাজ্যৰ বৃহত্তম সুৰাজনিত অপঘটনাত ইজনৰ পিছত সিজন লোকৰ মৃত্যু অব্যাহত আছে। এই পৰ্য্যন্ত চৰকাৰী হিচাপমতে, ৯৮জন লোকৰ মৃত্যু হৈছে এই মৰ্মান্তিক ঘটনাটোত। গোলাঘাটৰ চিকিৎসালয়ত ৪৭জন আৰু যোৰহাট চিকিৎসালয়ত ৫১জনৰ মৃত্যুৰ তথ্য পোৱা গৈছে।
ইপিনে ঘটনাটোৰ মূল কেন্দ্ৰ শালমাৰী বাগিচাত (অফিচিয়েল নাম শালমিৰা) মৃতদেহৰ গণ-সৎকাৰৰ কৰুণ দৃশ্য দেখা গৈছে। ৰাইজে একত্ৰিত হৈ মৃতদেহবোৰ দাহ কৰাৰ দৃশ্য হৃদয়বিদাৰক।
স্থানীয় লোকে জনোৱামতে, শালমাৰী বাগিচাৰ এখন ফিল্ডৰ কাষতে থকা শ্মশানত মৃতদেহবিলাক পৰ্য্যায়ক্ৰমে দাহ কৰি গৈছে স্থানীয় লোকে।
উল্লখযোগ্য যে মৃতদেহ দাহ কৰা স্থানলৈ আজি কংগ্ৰেছী বিধায়ক ৰূপজ্যোতি কুৰ্মী, ৰকিবুল হুছেইন গৈছিল যদিও শোকদগ্ধ ৰাইজৰ ৰোষত পৰে আৰু তাৰ পৰা নতশিৰে গুচি আহিব লগীয়া হয়। ৰাইজে তেওঁলোকক সংবাদ মাধ্যমৰ আগত ৰাজনৈতিক মন্তব্য কৰাৰ পৰা বাৰণ কৰে।
বিধায়ক ৰূপজ্যোতি কুৰ্মীয়ে পিছত সংবাদ মাধ্যমৰ আগত অভিযোগ কৰে যে বিজেপিৰ বিধায়ক মৃণাল শইকীয়াৰ সাংগোপাংগই তেওঁলোকক সংবাদ মাধ্যমৰ আগত কথা কোৱাৰ পৰা বাধা দিয়ে।
