নাগৰিকত্ব সংশোধনী বিধেয়কৰ বিৰুদ্ধে উত্তৰ-পূবৰ ৰাইজৰ পক্ষত থাকি বলিষ্ঠ পদক্ষেপ লৈছিল মেঘালয়ৰ মুখ্য মন্ত্ৰী কনৰাড চাংমাই। যাৰ বাবে উত্তৰ-পূবৰ ৰাইজৰ আস্থাভাজন হৈ পৰিছিল মুখ্য মন্ত্ৰী চাংমা।
কিন্তু উত্তৰ-পূবৰ ৰাইজ তথা দল সংগঠনে তীব্ৰ বিৰোধিতা কৰা নাগৰিকত্ব সংশোধনী বিধেয়কখনৰ বিৰুদ্ধে শক্তিশালী স্থিতি লোৱা চাংমাৰ মুখত হঠাৎ বিধেয়কখনৰ পুনৰ বিবেচনাৰ প্ৰসংগ উচ্ছাৰিত হৈছে।
বুধবাৰে গুৱাহাটীত নেশ্যনেল পিপ’লচ পাৰ্টিৰ অসম ৰাজ্যিক শাখাৰ আনুষ্ঠানিক শুভাৰম্ভণীৰ পাছত অনুষ্ঠিত এখন সংবাদমেলত চাংমাই বিধেয়কখনৰ প্ৰয়োজনত পুনৰ বিবেচনাৰ প্ৰসংগ উত্থাপন কৰিছে।
শেহতীয়াভাৱে যিধৰণে বিধেয়কখন সাজু কৰা হৈছিল সেইধৰণে ইয়াক গ্ৰহণযোগ্য নহয় বুলি মন্তব্য কৰি তেওঁ কয়, ‘যদি আগলৈ ইয়াৰ বাবে পুনৰ পৰামৰ্শ লোৱা হয় আৰু আমাৰ সকলোৰে লগত আলোচনা কৰে, তেতিয়া আমি বিষয়টো বিবেচনা কৰি চাম’।
উল্লেখযোগ্য যে, উত্তৰ-পূবৰ ৰাইজ তথা বিভিন্ন দল-সংগঠনে বিধেয়কখনক উত্তৰ-পূব বিৰোধী আখ্যা দিয়াৰ লগতে ই ভাৰতীয় সংবিধান বিৰোধী বুলিও দাবী কৰি আহিছে। কিন্তু কনৰাড চাংমাই আজি কোৱাৰ দৰে কেনে পৰিস্থিতিত বিধেয়কখনৰ পুনৰ বিবেচনাৰ বাবে তেওঁ ৰাজি হ’ব সেয়াহে চিন্তনীয়।
তেওঁ লগতে কয়, ‘মই অকলেই বিধেয়কখনৰ পৰা কোনো এটা দফা উঠাই দিব লাগে বুলি কৈ দিব নোৱাৰো। কাৰণ ইয়াত সমগ্ৰ উত্তৰ-পূৱৰ বিষয় জড়িত আছে। গতিকে সমগ্ৰ উত্তৰ-পূবৰ বিধেয়ক বিৰোধী ৰাজনৈতিক দল আৰু বিভিন্ন সংগঠনসমূহে একেলগে আলোচনা কৰিহে সিদ্ধান্ত ল’ব লাগিব’।
অৱশ্যে বিধেয়কখনৰ জৰিয়তে উত্তৰ-পূৱ ‘টাৰগেট’ হ’ব নোৱাৰিব বুলিও তেওঁ সংবাদমেলখনত স্পষ্ট কৰি দিয়ে।
বিধেয়ক বিৰোধী আন্দোলনত চাংমাই লোৱা পদক্ষেপৰ বাবে উত্তৰ-পূব ছাত্ৰ সংগঠন, সদৌ অসম ছাত্ৰ সন্থাকে ধৰি বিভিন্ন দল সংগঠন আৰু সাধাৰণ ৰাইজে তেওঁৰ শলাগ লৈছিল। কনৰাড চাংমাই নিজেও উত্তৰ-পূবৰ ৰাজনৈতিক দলসমূহক একত্ৰিত কৰিছিল। এতিয়া বিধেয়কখন সন্দৰ্ভত তেওঁৰ পৰৱৰ্তী স্থিতি কি হয় সেয়া নিশ্চয়কৈ লক্ষনীয় হ’ব।
