অসমৰ জনপ্ৰিয় কণ্ঠশিল্পী জুবিন গাৰ্গক পুৰুষোত্তম দাস বঁটাৰে সন্মানিত কৰা হয়। বৰপেটাত অনুষ্ঠিত হৈ থকা চাউলখোৱা মহোৎসৱত সোমবাৰে জুবিনক অসমীয়া লোকসংগীতক জনপ্ৰিয় আৰু বিশ্বমুখি কৰা বাবে এই বঁটা প্ৰদান কৰা হয়।
অসমীয়া সংগীত জগতৰ প্ৰখ্যাত গীতিকাৰ আৰু সুৰকাৰ পুৰষোত্তম দাসৰ নামত প্ৰদান কৰা বঁটাৰ বাবে জুবিনক যোগ্য হিচাপে বিবেচনা কৰা বাবে উদ্যোক্তা সমিতিক তেওঁ ধন্যবাদ জ্ঞাপন কৰে।
আনহাতে, বঁটা গ্ৰহণ কৰি সাংবাদিকৰ আগত জুবিনে লোকসংগীতৰ সাধকজনৰ নামৰ লগত জড়িত বঁটা গ্ৰহণ কৰিব পাই অতিশয় সুখী বুলি কয় আনহাতে অসমীয়া লোকসংগীতৰ ভেটি আৰু সৌন্দৰ্য্য ভাৰত বৰ্ষৰ কোনো ঠাইৰ লগতে তুলনা নহয় বুলি উল্লেখ কৰি জনপ্ৰিয় গায়কজনে ইয়াৰ হকে গোটেই জীৱন জুৰি কাম কৰি যাব বুলি মন্তব্য কৰে।
উল্লেখযোগ্য যে, ৰঙৰ উৎসৱ ফাকুৱাৰ প্ৰাকক্ষণত সাতদিনীয়া কাৰ্য্যসূচীৰে বৰপেটা জিলাৰ চাউলখোৱা নৈৰ পাৰত আৰম্ভ হৈছে চাউলখোৱা মহোৎসৱ। হাজাৰ হাজাৰ দৰ্শকেৰে ঠাহ খাই পৰা সভাগৃহত বঁটা গ্ৰহণ কৰি জুবিনে বৰপেটাবাসীক ধন্যবাদ জ্ঞাপন কৰে। আনহাতে অনুষ্ঠানত জনপ্ৰিয় গায়কজনে ভালেকেইটা গানো পৰিবেশন কৰে।
