লোকসভা প্ৰথম পৰ্যায়ৰ নিৰ্বাচনৰ মনোনয়নৰ আজি অন্তিম দিন। অহা ১১ এপ্ৰিলত অসমত অনুষ্ঠিত হ’ব লোকসভাৰ প্ৰথম পৰ্যায়ৰ নিৰ্বাচন।
মনোনয়ন দাখিলৰ অন্তিমটো দিনত আজি কংগ্ৰেছ, বিজেপি অগপকে ধৰি কেইবাগৰীক প্ৰাৰ্থীয়ে ৰিটাৰ্নিং বিষয়াৰ কাৰ্যালয়ত নিজৰ নিজৰ মনোনয়ন দাখিল কৰিব।
এই অনুসৰি ডিব্ৰুগড় সমষ্টিৰ কংগ্ৰেছৰ প্ৰাৰ্থী পৱন সিং ঘাটোৱাৰ (প্ৰাক্তন কেন্দ্ৰীয় মন্ত্ৰী তথা সাংসদ)ও দাখিল কৰিব নিজৰ মনোনয়ন পত্ৰ। তাৰোপৰি যোৰহাট লোকসভা সমষ্টিৰ বিজেপি প্ৰাৰ্থী তপন গগৈয়েও দিনৰ ১১.৩০ বজাত ৰিটাৰ্নিং বিষয়াৰ কাৰ্যালয়ত নিজৰ মনোনয়ন পত্ৰ দাখিল কৰিব। মনোনয়ন পত্ৰ দাখিলৰ সময়ত গগৈৰ লগত মুখ্য মন্ত্ৰী সৰ্বানন্দ সোণোৱাল আৰু নেডাৰ আহ্বায়ক হিমন্ত বিশ্ব শৰ্মা উপস্থিত থাকিব।
আনহাতে আজি তেজপুৰ সমষ্টিৰ কংগ্ৰেছ প্ৰাৰ্থী এম জি ভি কে ভানু (অসম চৰকাৰৰ অৱসৰপ্ৰাপ্ত অতিৰিক্ত মুখ্য সচিব), বিজেপি প্ৰাৰ্থী পল্লৱলোচন দাস, কলিয়াবৰ সমষ্টিৰ অগপ প্ৰাৰ্থী মণিমাধৱ মহন্তয়ো মনোনয়ন পত্ৰ দাখিল কৰিব। ইফালে মঙলদৈ লোকসভা সমষ্টিৰ বিজেপি প্ৰাৰ্থী দিলীপ শইকীয়া আৰু কংগ্ৰেছ প্ৰাৰ্থী ভুৱনেশ্বৰ কলিতায়ো আজি অন্তিমটো দিনত মনোনয়ন পত্ৰ দাখিল কৰিব।
