বোকাখাত মহকুমা চুতীয়া ছাত্ৰ সন্থাৰ উদ্যোগত, বোকাখাত আঞ্চলিক চুতীয়া ছাত্ৰ সন্থা আৰু বোকাখাতৰ ৰাইজৰ সহযোগত গোলাঘাট জিলা চুতীয়া ছাত্ৰ সন্থাৰ দ্বি বার্ষিক অধিবেশনখন দুদিনীয়া কাৰ্যসুচীৰে ১ আৰু ২ এপ্রিল তাৰিখে বোকাখাত কেন্দ্ৰীয় বিহুতলিত অনুষ্ঠিত হব।
প্রথম দিনৰ কাৰ্যসূচী অনুসৰি ৰাতিপুৱা মূলতোৰণ উদ্ধোধন কৰিব বোকাখাতৰ জ্যেষ্ঠ সাংবাদিক তথা আপকুৰ উপদেষ্টা ভৱেশ শইকীয়াই ৷ কাৰ্যালয় গৃহ উদ্বোধন কৰিব বোকাখাত যান-বাহন শাখাৰ আৰক্ষী বিষয়া গোবিন কাকতিয়ে ৷ পতাকা উত্তোলন কৰিব গোলাঘাট জিলা চুতীয়া ছাত্ৰ সন্থাৰ সভাপতি পাপু শইকীয়াই ৷ সতী সাধনীৰ প্ৰতিমুৰ্তিত মাল্যাৰ্পন কৰিব উদযাপন সমিতিৰ সভাপতি প্রশান্ত শইকীয়াই আৰু স্মৃতি তৰ্পণ কৰিব গোলাঘাট জিলা চুতীয়া ছাত্ৰ সন্থাৰ সাধাৰণ সম্পাদক ৰিতু শইকীয়াই ৷
আনহাতে, স্থানীয় সমাজ সেৱক দেৱপ্ৰদীপ বৰা আৰু অভিযন্তা প্ৰদীপ বৰাই বৃক্ষৰোপন কাৰ্যসূচীত ভাগ লব।পৰস্পৰাগতভাবে চুতীয়া জাতিৰ দেও কুবেৰৰ শলিতা লগোৱা সকাম পৰিচালনা কৰিব বৰদেউৰী প্রতাপ চন্দ্ৰ নেওগ, মাজু দেউৰী যতীন শইকীয়া আৰু সৰু দেউৰী ৰবীন হাজৰিকাই।
অধিবেশনৰ লগত সংগতি ৰাখি প্ৰথন দিনা ছাত্ৰ-ছাত্ৰী সকলৰ মাজত ৰচনা, কুইজ আৰু চিত্ৰাংকন প্ৰতিযোগিতা অনুষ্ঠিত কৰা হ’ব। বিয়লিৰ ভাগত অনুষ্ঠিত হ’বলগীয়া প্ৰতিনিধি সভা উদ্ধোধন কৰিব সদৌ অসম চুতীয়া ছাত্ৰ সন্থাৰ সহকাৰী সম্পাদক লক্ষী বৰাই। আনহাতে, বন্তি প্ৰজ্বলনত অংশগ্ৰহণ কৰিব বোকাখাত আৰক্ষী থানাৰ ভাৰপ্ৰাপ্ত আৰক্ষী বিষয়া ৰূপেশ্বৰ বৰাই।
দ্বিতীয়দিনা প্ৰতিযোগিতামূলক সাংস্কৃতিক শোভাযাত্ৰা অনুষ্ঠিত কৰা হ’ব বুলি উদ্যোক্তা সমিতিয়ে জনাইছে। শোভাযাত্ৰা উদ্বোধন কৰিব বিশিষ্ট অভিনেতা অৰুণ হাজৰিকাই ।
বিয়লি অনুষ্ঠিত হ’ব মুকলি সভা। মুকলি সভাত অংশগ্ৰহণ কৰিব সদৌ অসম চুতীয়া ছাত্ৰ সন্থাৰ মুখ্য উপদেষ্টা মধুমাধৱ শইকীয়া, সদৌ অসম চুতীয়া ছাত্র সন্থাৰ সভাপতি ক্ষীৰোদ শইকীয়া, অসম চৰকাৰৰ কৃষি আৰু পশুপালন মন্ত্রী অতুল বৰা, জলসম্পদ মন্ত্রী কেশৱ মহন্ত আৰু কলিয়াবৰ লােকসভা সমষ্টিৰ সাংসদ গৌৰৱ গগৈয়ে।
