ভোটকেন্দ্ৰত শাৰী পতাত বহুতে পোৱা আমনি দূৰ কৰি আসন্ন নিৰ্বাচনত অনলাইন ভোটৰ ব্যৱস্থা কৰা হৈছে বুলি চলা এক বৃহৎ ভুৱা বাতৰিক লৈ দেশবাসীক সাৱধান কৰি দিছে ভাৰতৰ নিৰ্বাচন আয়োগে।
চ’চিয়েল মিদিয়াযোগে প্ৰচাৰিত হোৱা ভুৱা বাতৰিটোত কোৱা হৈছে, “ভাৰতীয় পাৰপত্ৰ থকাসকলে, এতিয়া ২০১৯ৰ নিৰ্বাচনত অনলাইনযোগে ভোট দিব পাৰিব।”
কিন্তু অনলাইন ভোটদানৰ কোনো ব্যৱস্থা নাই বুলি স্পষ্ট কৰি দিছে আয়োগে। “কোনো প্ৰকাৰৰ ভোটাৰৰ বাবেই কোনো ধৰণৰ অনলাইন ভোটদানৰ ব্যৱস্থা নাই,” আয়োগৰ স্পষ্টীকৰণ।
আয়োগে লগতে প্ৰকাশ কৰিছে যে বিদেশত থকা ভাৰতীয়ৰ বাবেও এনে কোনো ব্যৱস্থা কৰা হোৱা নাই।
তেওঁলোকেও ভোটৰ দিনা নিৰ্দিষ্ট কেন্দ্ৰলৈ আহিহে পাছপ’ৰ্ট দেখুৱাই ভোটাধিকাৰ সাব্যস্ত কৰিব পাৰিব।
বিদেশবাসী ভাৰতীয়ৰ বাবে মুকলি কৰা অনলাইন সুবিধাটো হৈছে, তেওঁলোকে ভোটাৰ হেল্পলাইন এপ বা nvsp.inত ৬এ’ প্ৰপত্ৰ দাখিল কৰি নাম পঞ্জীয়ন কৰিব পাৰিব।
