“অসমৰ ব্ৰেণ্ড এম্বেচাডৰ প্ৰিয়ংকা চোপ্ৰা নাচিবলৈ আহিলে শিৱসাগৰ চাবলৈ মানুহ নাহে। ৰংঘৰ, তলাতল ঘৰৰ বাবে লোৱা লাইট এণ্ড চাউণ্ডৰ আঁচনি কাৰ্যকৰী কৰিলেহে শিৱসাগৰলৈ পৰ্যটক আহিব। ৰংঘৰত কেৱল লাইট জ্বলাই বা মিউজিক বজাই নহয়, শিৱসাগৰৰ ইতিহাস প্ৰদৰ্শন কৰিব লাগিব। গাড়ীৰ লাইটৰেও ৰংঘৰ চাব পাৰি”। পৰ্যটন বিভাগক উদ্দেশ্যি এই কথা ব্যক্ত কৰে যোৰহাট লোকসভাৰ কংগ্ৰেছ দলৰ প্ৰাৰ্থী সুশান্ত বৰগোহাঁইয়ে।
বুধবাৰে সন্ধিয়া শিৱসাগৰৰ কংগ্ৰেছ ভৱনত এখন সংবাদমেল সম্বোধন কৰি সুশান্ত বৰগেহাঁইয়ে কয়, ‘যোৰহাট লোকসভা সমষ্টিত আঠগৰাকী প্ৰাৰ্থীয়ে প্ৰাৰ্থিত্ব লাভ কৰিছে যদিও মোৰ প্ৰতিদ্বন্দ্বি ভাৰতীয় জনতা পাৰ্টীৰ তপন কুমাৰ গগৈয়ে হ’ব। আৰু এই যুঁজ আকৰ্ষণীয় হ’ব। বহু কংগ্ৰেছ বিৰোধী ৰাজনৈতিক দলে আমাক পূৰ্ণ সমৰ্থন আগবঢ়াইছে। নাগৰিকত্ব বিধেয়কৰ বিৰোধিতা কৰি আমি ৰাইজৰ পক্ষ লোৱাৰ বাবে অসমবাসী ৰাইজ আৰু অসম গণ পৰিষদকে ধৰি বিভিন্ন জাতীয় সংগঠন আৰু বিজেপিৰ তৃণমূল পৰ্যায়ৰ বহু নেতা-কৰ্মীয়ে এই নিৰ্বাচনত আমাক সমৰ্থন আগবঢ়াইছে’।
সমাগত নিৰ্বাচনত তেওঁ মূল ইচ্ছ্যু সম্পৰ্কত কয়, ‘বৰ্তমানৰ বিজেপি চৰকাৰে যোৰহাট, শিৱসাগৰৰ অ’ এন জি চিৰ দুই-তিনিখন তৈলক্ষেত্ৰ ব্যক্তিগত খণ্ডৰ কোম্পানীক গতাইছে। চৰকাৰৰ এই সিদ্ধান্ত বাতিল কৰিবৰ বাবে কংগ্ৰেছে ব্যৱস্থা কৰিব’।
বিজেপিয়ে পাঁচ বছৰ পূৰ্বে দিচাংমুখ আৰু ঢকুৱাখানা সংলগ্ন এখন দলঙৰ কথা ঘোষণা কৰিছিল। কিন্তু এই দলংখন বনোৱাটো বাদেই চাৰ্ভেৰে কাম নকৰিলে, তাৰোপৰি যোৰহাট মাজুলীৰ দলং আৰু ফৰলেনযুক্ত ৰাষ্ট্ৰীয় পথ চাৰি বছৰৰ ভিতৰত সম্পূৰ্ণ কৰাৰ প্ৰতিশ্ৰুতি দিছিল যদিও সেইয়া সম্পূৰ্ণ হৈ নুঠিল। যাৰ বাবে আন জিলাৰ তুলনাত যাতায়তৰ ক্ষেত্ৰত বহু পিছ পৰি ৰ’ল শিৱসাগৰ। এই ক্ষেত্ৰত আমি ব্যৱস্থা গ্ৰহণ কৰিম। উল্লেখ্য যে সুশান্ত বৰগোহাঁই বিধায়ক হৈ থকা কাৰ্যকালত থাওৰা সমষ্টিত বহুকেইখন দলঙৰ কাম প্ৰায় ৮০ শতাংশ সম্পূৰ্ণ কৰি তুলিছিল।
তেওঁ কয় আমাৰ ইয়াত দেখা দিয়া আন এটা ডাঙৰ সমস্যা হল নিবনুৱা সমস্যা। আৰু এই নিবনুৱা সমস্যাৰ প্ৰধান কাৰণটো হল ৰাজনৈতিক পৃষ্ঠপোষকতা অ’ এন জি চিত চলি থকা চিণ্ডিকেটৰাজ। যাৰ বাবে নতুন প্ৰজন্মৰ বহু ল’ৰাৰ অ’ এন জি চিত কামবন লাভ কৰিব পৰা নাই। কেৱল বিজেপি নেতাৰ নেতৃত্বত আৰু চত্ৰছায়াত চলা চিণ্ডিকেট ব্যৱস্থাৰ বাবে একেখিনি ল’ৰাই কাম লাভ কৰি আহিছে।
যোৱা পাঁচটা বছৰে একো উন্নয়নয়েই কৰিব নোৱাৰিলে বিজেপি চৰকাৰ খনে। পেট্ৰ’লিয়াম ইনষ্টিটিউটৰ কাম আধাৰুৱা হৈ ৰ’ল।থাওৰাত নিৰ্মিত অ’ এন জি চিৰ চুপাৰ স্পেচিয়েলিতি হাস্পতালখনৰ ৪০/৫০ শতাংশ কাম সম্পন্ন হৈছে যদিও এতিয়া আৰ এছ এছৰ হাতত গতাই দিয়া হৈছে। যদি মই জয়ী হও এই হাস্পতালখনক আৰ এছ এছৰ কবলৰ পৰা মুক্ত কৰি তাত কাম বন কৰিবলৈ সৰ্বসাধাৰণ ৰাইজ তথা স্থানীয় যুৱকে যাতে সুবিধা পাই তাৰ ব্যৱস্থা কৰিম বুলি তেওঁ মন্তব্য কৰে।
মোদী ডাঙৰীয়াই বানপানী সমস্যাক ৰাষ্ট্ৰীয় সমস্যা হিচাপে ঘোষণা কৰিম বুলি প্ৰতিশ্ৰুতি দিছিল যদিও আজিলৈকে কিন্তু ঘোষণা নকৰিলে আৰু বানপানী গড়াখহনীয়াৰ বাবে যি পুঁজি দিব লাগিছিল সেই পুঁজি আবন্টন নিদিলে যাৰ বাবে বান গড়াখহনীয়াৰ বাবে বহু অঞ্চল নি:শেষ হৈ যোৱাৰ পথত। যদি নিৰ্বাচনত জয়ী হও শিৱসাগৰৰ বাবে বিশেষ আঁচনি গ্ৰহণ কৰি শিৱসাগৰত এখন পৰ্যটন নগৰী হিচাপে গঢ়ি তুলিম।
