অহা ১৫ মে’ৰ পৰা ইংলেণ্ডৰ মানচেষ্টাৰ চিটিৰ এটিহাড ষ্টেডিয়ামত হ’ব লগীয়া বিশ্ব ছিনিয়ৰ টাইকোৱানডো প্ৰতিযোগিতাত ভাৰতৰ হৈ প্ৰতিদ্বন্দ্বিতা কৰিবলৈ সুযোগ লাভ কৰিছে অসমৰ দুগৰাকী প্ৰতিভাৱান খেলুৱৈয়ে। খেলুৱৈ দুগৰাকী হ’ল ৰ’দালি বৰুৱা আৰু দীপিকা হাজৰিকা।
যোৱা বছৰ ইণ্ডোনেছিয়াৰ জাকাৰ্টাত অনুষ্ঠিত হোৱা এছিয়ান গেইমছত ভাৰতক প্ৰতিনিধিত্ব কৰা ৰ’দালি বৰুৱাই প্ৰতিযোগিতাখনত ৭৩ কেজি ওজন শাখাত আৰু দীপিকাই ৪৬ কেজি শাখাত খেলিব।
উল্লেখ্য যে বিশ্বৰ প্ৰায়বোৰ আগশাৰীৰ দেশৰ খেলুৱৈৰে সমৃদ্ধ হ’ব লগীয়া প্ৰতিযোগিতাখনত ৰ’দালিয়ে এইবাৰ পদক বুটলি অনাৰ পূৰ্ণ সম্ভাৱনা আছে বুলি অসম টাইকোৱানডো সন্থাই আশা প্ৰকাশ কৰে।
একেদৰে দীপিকাও বেছ প্ৰতিভাৱান। দুয়োগৰাকী খেলুৱৈৰ অন্তৰ্ভুক্তিত অসম টাইকোৱানডো সন্থাৰ সম্পাদক হিৰণ্য শইকীয়াই সন্তোষ প্ৰকাশ কৰাৰ লগতে সফলতা কামনা কৰিছে।
উল্লেখযোগ্য যে যোৱাবাৰ ভিয়েটনামত অনুষ্ঠিত ২৩ সংখ্যক এছিয়ান চেম্পিয়নশ্বিপত দেখুওৱা সুন্দৰ প্ৰদৰ্শন আৰু জাকাৰ্টাত অনুষ্ঠিত ১৮ সংখ্যক এছিয়ান গেইমছ আমন্ত্ৰণমূলক টাইকোৱানডো প্ৰতিযোগিতাতত ব্ৰঞ্জৰ পদক লাভ কৰাৰ সুবাদত তেজপুৰৰ জীয়ৰী ৰ’দালিয়ে জাকাৰ্টা এছিয়ান গেইমছৰ বাবে ভাৰতীয় দলত স্থান লাভ কৰিবলৈ সক্ষম হৈছিল।
