গুৱাহাটীত “আপোন মানুহ”ৰ সন্ধানত কুইন ওজা বনাম ববিতা শৰ্মা

“বিদেশতো আপোন মানুহ” টি ভি ধাৰাবাহিকেৰে অসমৰ লগতে গোটেই পৃথিৱীৰ অসমীয়া মানুহৰ মাজত ব্যাপকভাৱে জনপ্ৰিয় হৈ পৰা ববিতা শৰ্মাৰ লগতে কুইন ওজাই এইবাৰ গুৱাহাটী লোকসভা সমষ্টিত সন্ধান কৰিছে আপোন মানুহৰ।

কংগ্ৰেছ প্ৰাৰ্থীৰূপে শৰ্মাৰ নাম ঘোষিত হোৱাৰ পিছত ২৩ এপ্ৰিলৰ ভোটযুদ্ধত তেওঁ আৰু বিজেপি মিত্ৰজোঁটৰ কুইন ওজাৰ মাজতে মূল প্ৰতিদ্বন্দ্বিতা হ’ব বুলি ধাৰণা কৰা হৈছে।

অসমৰ ১৪টাৰ বা সমগ্ৰ উত্তৰ-পূবৰ ২৫ টা সমষ্টিৰ ভিতৰত সকলোৰে লক্ষ্য ৭ নম্বৰ গুৱাহাটী লোকসভা সমষ্টিলৈ। উত্তৰ-পূবৰ দুৱাৰমুখ গুৱাহাটী মহানগৰীৰ অন্তৰ্গত চাৰিটা বিধানসভা সমষ্টি আৰু আন ছটা বিধান সভা সমষ্টিক লৈ গঠিত এই সংসদীয় সমষ্টিটোত আছে ২১ লক্ষাধিক ভোটাৰ।

দুয়োগৰাকী প্ৰাৰ্থীয়েই গুৱাহাটীৰ স্থায়ী বাসিন্দা তথা দীৰ্ঘদিন ধৰি ৰাজনীতিৰ লগতে প্ৰত্যক্ষভাৱে জড়িত হৈ আছে। অসমৰ লগতে উত্তৰ-পূবৰেই সুকীয়া গুৰুত্ব থকা গুৱাহাটী সমষ্টিৰ বাবে দুই প্ৰধান ৰাজনৈতিক শক্তি বিজেপি আৰু কংগ্ৰেছে আগবঢ়োৱা প্ৰাৰ্থীৰ অৰ্হতা সম্পৰ্কে এই প্ৰতিবেদনত তথ্য দাঙি ধৰা হৈছে।

সমষ্টিটোৰ বিজেপিৰ প্ৰাৰ্থী কুইন ওজাৰ বয়স ৬৭ বছৰ। ১৯৬৮ চনত পাণবজাৰ ছোৱালী উচ্চ মাধ্যমিক বিদ্যালয়ৰ পৰা প্ৰৱেশিকা পৰীক্ষাত উত্তীৰ্ণ হৈছিল এইবাৰৰ বিজেপিৰ প্ৰাৰ্থীগৰাকী। আনহাতে, কংগ্ৰেছ প্ৰাৰ্থী ববিতা শৰ্মাৰ বয়স ৫২ বছৰ। তেওঁ কটন কলেজৰ পৰা স্নাতক আৰু গুৱাহাটী বিশ্ববিদ্যালয়ৰ পৰা স্নাতকোত্তৰ। পৰৱৰ্তী সময়ত পশ্চিমবংগৰ যাদৱপুৰ বিশ্ববিদ্যালয়ত গৱেষণাৰ ছাত্ৰী আছিল যদিও গৱেষণা সম্পূৰ্ণ নকৰিলে।

বিজেপিৰ প্ৰাৰ্থী কুইন ওজা অসম আন্দোলনৰ লগত প্ৰত্যক্ষভাৱে জড়িত হৈ পাছত ১৯৮৫ চনত অসম গণ পৰিষদৰো সদস্য হৈ প্ৰত্যক্ষ ৰাজনীতিৰ লগত জড়িত হৈ পৰে। ১৯৯৬ চনৰ পৰা ১৯৯৭ চনলৈ তেওঁ গুৱাহাটী পৌৰ নিগমৰ মেয়ৰ হিচাপেও কাৰ্যনিৰ্বাহ কৰে। ২০১১ চনৰ বিধান সভা নিৰ্বাচনত পূব গুৱাহাটী সমষ্টিৰ পৰা প্ৰতিদ্বন্দ্বিতাত অৱতীৰ্ণ হৈছিল যদিও পৰাজিত হয়। ২০১৪ চনলৈ তেওঁ অগপৰ ভগ্নী সংগঠন অসম মহিলা পৰিষদৰো সাধাৰণ সম্পাদিকাৰ দায়িত্বত আছিল। পাছত ২০১৪ চনত তেওঁ অগপ ত্যাগ কৰি বিজেপিত যোগ দিয়ে। শেহতীয়াভাৱে দলটোৰ অসম ৰাজ্যিক সমিতিৰ মুখপাত্ৰৰ দায়িত্বত আছে কুইন ওজা।

ইপিনে, কংগ্ৰেছ প্ৰাৰ্থী ববিতা শৰ্মাও ১৯৮৫ চনত ছাত্ৰী অৱস্থাতেই ভাৰতীয় জাতীয় কংগ্ৰেছৰ সদস্যা হয়। অৱশ্য ২০০২ চনৰ পৰাহে তেওঁ ৰাজনৈতিকভাৱে যথেষ্ট সক্ৰিয় হৈ পৰে। ২০০২ চনত তেওঁ কংগ্ৰেছৰ মুখপাত্ৰ হিচাপে নিযুক্ত হয়।

পৰৱৰ্তী সময়ত প্ৰদেশ কংগ্ৰেছৰ সাধাৰণ সম্পাদক, উত্তৰ-পূব কংগ্ৰেছ সমন্বয়ৰক্ষী সমিতিৰ সাধাৰণ সম্পাদক, বিধান সভা আৰু লোকসভা নিৰ্বাচনৰ প্ৰচাৰ বিভাগৰ তত্বাৱধায়ক হিচাপেও দায়িত্ব লাভ কৰে। বৰ্তমান দলটোৰ সাধাৰণ সম্পাদক, জ্যেষ্ঠ মুখপাত্ৰ আৰু অসম প্ৰদেশ কংগ্ৰেছৰ গৱেষণা বিভাগৰ অধ্যক্ষা হিচাপে দায়িত্বত আছে ববিতা শৰ্মা। ২০১৬ চনত ববিতা শৰ্মাই পূব গুৱাহাটী সমষ্টিৰ পৰা কংগ্ৰেছৰ প্ৰাৰ্থী হিচাপে অৱতীৰ্ণ হৈছিল যদিও পৰাজিত হয়।

বিজেপিৰ প্ৰাৰ্থীগৰাকী সুদীৰ্ঘ ৩৩ বছৰ ৰাজনৈতিক আৰু সামাজিক ক্ষেত্ৰৰ লগত ওতপ্ৰোতভাৱে জড়িত। আনহাতে কংগ্ৰেছ প্ৰাৰ্থীগৰাকী প্ৰথমাৱস্থাত শৈক্ষিক আৰু সাংস্কৃতিক ক্ষেত্ৰৰ লগতহে বেছিকৈ জড়িত আছিল।

ববিতা শৰ্মা ১৯৯৩ চনৰ ২০০২ চনলৈ গুৱাহাটীৰ পাণ্ডু কলেজৰ বুৰঞ্জী বিভাগৰ প্ৰবক্তা হিচাপে চাকৰি কৰিছিল। তেওঁ এগৰাকী অভিনেত্ৰী হোৱাৰ উপৰিও তেওঁ প্ৰযোজক তথা পৰিচালক হিচাপেও চিনাকি আছে।

শৈশৱৰ পৰাই অভিনয় জগতৰ লগত জড়িত ববিতা শৰ্মাই ১৯৭৮ চনত মুক্তিলাভ কৰা ভবেন্দ্ৰ নাথ শইকীয়াৰ ‘অনিৰ্বাণ’ ছবিত শিশু অভিনেতা হিচাপে ছবিজগতত আত্মপ্ৰকাশ কৰে। পৰৱৰ্তী সময়ত কেইবাখনো চলচিত্ৰ আৰু ধাৰাবাহিকতো অভিনয় কৰে তেওঁ।

বিদেশত আপোন মানুহ ধাৰাবাহিকেৰে জনপ্ৰিয়তা অৰ্জন কৰিছিল শৰ্মাই। আমেৰিকা, গ্ৰে’ট বৃটেইন, কানাডা, অষ্ট্ৰেলিয়া, নিউজিলেণ্ড, চিংগাপুৰ, থাইলেণ্ড, ডুবাই, নেডাৰলেণ্ডছ, জাৰ্মেনি আদি দেশ ভ্ৰমণ কৰি তাত থকা প্ৰবাসী অসমীয়াসকলক লৈ তেওঁ এই ধাৰাবাহিক নিৰ্মাণ কৰিছিল। গুৱাহাটী দূৰদৰ্শন কেন্দ্ৰৰ ইংৰাজী বাতৰি পৰিৱেশকো আছিল ববিতা শৰ্মা।

তেওঁ অসমীয়া চলচ্চিত্ৰৰ ইতিহাসক লৈ লিখি উলিয়াইছিল The Moving Image and Assamese Culture: Joymoti, Jyotiprasad Agarwala and Assamese Cinema নামৰ ইংৰাজী গ্ৰন্থখন। অক্সফ’ৰ্ড য়ুনিভাৰ্চিটি প্ৰে’ছে প্ৰকাশ কৰিছিল এই গ্ৰন্থখন।

ইপিনে, ২০০৫ চনৰ পৰা ২০১৬ চনলৈ তেওঁ অসম চৰকাৰৰ অধীন অসম চলচ্চিত্ৰ (বিত্ত আৰু উন্নয়ন) নিগমৰ  অধ্যক্ষও আছিল। কেইবাটাও সামাজিক অনুষ্ঠানৰ সৈতেও জড়িত ববিতা শৰ্মা।