ঘোঁৰাত উঠি বীৰাংগনাৰ সাজেৰে আজি মনোনয়ন পত্ৰ দাখিল কৰে গুৱাহাটী লোকসভা সমষ্টিৰ নিৰ্দলীয় প্ৰাৰ্থী জোনমণি দেৱী খাউণ্ডে। সহস্ৰাধিক সমৰ্থকৰ সৈতে শৰাইঘাট দলঙৰ পৰা সদল বলে সমদল কৰি আহি আমিনগাঁওস্থিত কামৰূপ জিলা উপায়ুক্তৰ কাৰ্যালয়ত মনোনয়ন দাখিল কৰে প্ৰাৰ্থীগৰাকীয়ে।
আনহাতে, নিজকে বীৰঙ্গনাৰ সৈতে তুলনা কৰি প্ৰাৰ্থীগৰাকীয়ে কয় “অসম মূলগাভৰুৰ দেশ, বীৰঙ্গনাৰ দেশ। যিহেতু এইখন নিৰ্বাচনী যুজঁ গতিকে ময়ো এখন যুঁজত অৱতীৰ্ণ হবলৈ আহিছোঁ। বীৰঙ্গনা সকলক শ্ৰদ্ধা আৰু সন্মান জনাই তেওঁলোকৰ পথেৰে আগবাঢ়ি আহিছো।”
খাউণ্ডে লগতে কয় “গুৱাহাটী এটা সন্মানীয় সমষ্টি, গতিকে ইয়াত বসবাস কৰা লোকসকল শিক্ষিত আৰু সংস্কৃতিবান। সেয়েহে সংসদত তেওঁলোকৰ সমস্যা সমূহ দাঙি ধৰিবলৈ এগৰাকী যোগ্য প্ৰাৰ্থী বিচাৰিব সমষ্টিবাসী ৰাইজে।”
আনহাতে, নিৰ্বাচনত কোনবোৰ বিষয় বা সমস্যাক মূল ইচ্ছু হিচাপে লৈ আগবাঢ়িব বুলি কৰা প্ৰশ্নৰ উত্তৰত তেওঁ কয় “বিশেষকৈ কংগ্ৰেছ আৰু বিজেপিৰ দিনত বন্ধ হৈ যোৱা ঔদ্যোগসমূহ পুনৰ উজ্জীৱিত কৰাৰ বাবে চেষ্টা কৰিম বুলি ভাবিছোঁ।’’ স্বাস্থ্য সমস্যা, মহিলাৰ বাবে ৩০ শতাংশ আসন সংৰক্ষণৰ ব্যৱস্থা, খোৱা পানীৰ সমস্যা ইত্যাদি বিষয়লৈ ৰাইজৰ মাজলৈ যোৱাৰ বাবেও চেষ্টা কৰিম বুলি কয় জোনমণি দেৱী খাউণ্ডে।
