লোকসভা নিৰ্বাচন কাষচাপি অহাৰ লগে লগে ৰাজ্যত ক্ৰমাৎ বৃদ্ধি পাবলৈ ধৰিছে নিৰ্বাচনী আচৰণ বিধি ভংগৰ ঘটনা। নগাঁৱৰ ৰূপহীহাটত সংঘটিত হৈছে আন এক প্ৰাক-নিৰ্বাচনী হিংসাৰ ঘটনা।
ৰূপহীহাটৰ গেৰুৱাটিত প্ৰথম পৰ্য্যায়ৰ লোকসভা নিৰ্বাচনৰ প্ৰচাৰ চলাব যোৱাৰ সময়তে এন পি পিৰ প্ৰাৰ্থী আব্দুল আজিজৰ কনভয়ৰ তিনিখন গাড়ীত একাংশ কংগ্ৰেছী গুণ্ডাবাহিনীয়ে আক্ৰমণ কৰাৰ অভিযোগ তোলে দলটোৰ কৰ্মীসকলে ৷ গুণ্ডাবাহিনীৰ আক্ৰমণত আজিজৰ কনভয়ৰ তিনিখন গাড়ী বেয়াকৈ ক্ষতিগ্ৰস্থ হয়।
আক্ৰমণকাৰী দলটোৱে গাড়ীৰ কনভয়তে আক্ৰমণ কৰি ক্ষান্ত নাথাকি এন পি পিৰ কৰ্মী ছাদ্দাম হুছেইন, আবু তাহেৰ আৰু ছোৰহাব আলীক ইটা আৰু বেলচাৰে আক্ৰমণ কৰি গুৰুতৰ ভাবে আহত কৰে। আহত লোককেইজনক ততাতয়াকৈ চিকিৎসালয়ত ভৰ্তি কৰোৱা হয়।
আনহাতে, এন পি পিৰ প্ৰাৰ্থী আব্দুল আজিজে ঘটনা সন্দৰ্ভত কংগ্ৰেছী গুণ্ডাবাহিনীৰ বিৰুদ্ধে ৰূপহীঘাট আৰক্ষী থানাত এটা গোচৰ ৰূজু কৰিছে।
উল্লেখযোগ্য যে, প্ৰতিবাৰ নিৰ্বাচনৰ সময়ত চামগুৰি বিধানসভা সমষ্টিত একাংশ কংগ্ৰেছী গুণ্ডাবাহিনীয়ে বিভিন্ন সময়ত নিৰ্বাচনী হিংসাৰ সৃষ্টি কৰি অহাৰ অভিযোগ উত্থাপন হৈ আহিছে।
