আজি অনুষ্ঠিত হোৱা লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণৰ দিনটোত নুমলীগড়ত এজন প্ৰিজাইডিং বিষয়াই কৰ্তব্যৰ সময়তে সুৰাপান কৰাৰ ঘটনা ঘটে। ভোটগ্ৰহণ কেন্দ্ৰটোত মাতাল বিষয়াগৰাকীয়ে হুলস্থলীয়া পৰিস্থিতিৰ সৃষ্টি কৰে।
জানিব পৰা মতে, মাতাল প্ৰিজাইডিং বিষয়া শৈলেন নেওগ নুমলীগড়ৰ দৈগ্ৰং টী গাৰ্ডেন মিডিল ইংলিছ মিডিয়াম স্কুলত থকা ৭৪ নং ভোটকেন্দ্ৰটোত কৰ্তব্যৰত আছিল। উক্ত ভোটকেন্দ্ৰটোৰ চৌহদতে বিষয়াগৰাকীয়ে সুৰাপান কৰি অত্যন্ত অশোভনীয় আচৰণ কৰে।
সূত্ৰসমূহৰ পৰা জানিব পৰা মতে, বিষয়াগৰাকীৰ এনে আচৰণৰ বাবেই ভোটকেন্দ্ৰটোত ভোটগ্ৰহণত বাধাৰ সৃষ্টি হয়।
ইয়াৰ পাছতে নুমলীগড়ৰ আৰক্ষীয়ে প্ৰিজাইডিং বিষয়া শৈলেন নেওগক নিৰ্বাচনৰ ভোটগ্ৰহণৰ কৰ্তব্যৰ সময়ত সুৰাপান কৰাৰ অপৰাধত গ্ৰেপ্তাৰ কৰে।
আনহাতে, মাৰ্ঘেৰিটাৰ লামা গাঁও প্ৰাথমিক বিদ্যালয়ৰ ১৭২নং ভোটকেন্দ্ৰৰ পুলিং বিষয়াৰ দায়িত্বত থকা সাৰাধন দাস নামৰ বিষয়াগৰাকীয়ে আজি সুৰামত্ত হৈ অহাৰ বাবে চাঞ্চল্যৰ সৃষ্টি হৈছিল।
ইপিনে, গোলাঘাটৰ এটা ভোটকেন্দ্ৰত আন লোকৰ নামত ভোটদান কৰাৰ বাবে এক উত্তপ্ত পৰিস্থিতিৰ সৃষ্টি। গোলাঘাটৰ ৰতনপুৰ গাঁও পঞ্চায়তৰ ১৭২নং ভোটকেন্দ্ৰত এই ঘটনা সংঘটিত হয়।
জানিব পৰা মতে, এজন কংগ্ৰেছ কৰ্মীয়ে আন লোকৰ নামত ভোটদান কৰাক কেন্দ্ৰ কৰিয়েই ভোটকেন্দ্ৰটোত উত্তেজনাৰ সৃষ্টি হয়। ভোটকেন্দ্ৰটোত উপস্থিত থকা অগপ কৰ্মীসকলে কংগ্ৰেছ কৰ্মীজনক ভোটদান কৰাত বাধা প্ৰদান কৰে।
অগপৰ কৰ্মীয়ে ভোটদানত বাধা দিয়াত কংগ্ৰেছ কৰ্মীসকলে উদ্ভণ্ডালি কৰাৰ অভিযোগ উঠিছে। কংগ্ৰেছ কৰ্মীসকলে অগপৰ কাৰ্যালয় ভাঙি লণ্ডভণ্ড কৰা বুলি জানিব পৰা গৈছে।
