শিক্ষা, সাহিত্য আৰু সংস্কৃতিৰ লগত জড়িত ষাঠিৰোৰ্দ্ধৰ ব্যক্তিক অসম সাহিত্য সভাই প্ৰত্যেক বছৰে ব’হাগৰ পহিলা দিনটোত ওলগ জনাই আহিছে। অসম সাহিত্য সভাৰ শিৱসাগৰ জিলা সমিতিৰ অন্তৰ্গত ৰুদ্ৰসাগৰ, গৌৰীসাগৰ, চাৰিং, হাফলুটিং আৰু জাঁজী শাখা সাহিত্য সভায়ো বিগত বৰ্ষৰ দৰে এইবছৰ ব’হাগৰ পহিলা দিনটোত নিজ নিজ এলেকাত বহুকেইজন শিক্ষাবিদ, সমাজকৰ্মী তথা সাহিত্যিকক ওলগ জনায়।
ৰুদ্ৰসাগৰ শাখা সাহিত্য সভাই অঞ্চলটোৰ চাৰিজনকৈ ব্যক্তি– ভটীয়াপাৰৰ শিক্ষাবিদ কামাখ্যা বৰুৱা, নাট্যকাৰ প্ৰমোদ বৰুৱা, ৰূপহীবিল বনগাঁৱৰ সমাজকৰ্মী দণ্ডিধৰ দাস আৰু বলীয়াঘাট অঞ্চলৰ সমাজকৰ্মী হৰিসাধন দাসক একোখনকৈ ফুলাম গামোচা আৰু সম্বৰ্ধনা পত্ৰৰে ওলগ জনায়।
সম্বৰ্ধনা কাৰ্য্যসূচীত ৰুদ্ৰসাগৰ শাখা সাহিত্য সভাৰ সম্পাদক মৃগাংক হাজৰিকা, কাৰ্য্যকৰী সভাপতি সৰোজ বৰুৱা, সদস্য সোণমাই হাজৰিকাকে ধৰি বহুকেইজনে অংশগ্ৰহণ কৰে।
গৌৰীসাগৰ শাখা সাহিত্য সভায়ো বিশিষ্ট সমাজকৰ্মী কাতিৰাম বৰা আৰু সুৰেশ শইকীয়াক ওলগ জনায়। গৌৰীসাগৰ শাখা সাহিত্য সভাৰ সভাপতি, সম্পাদককে ধৰি বিষয়ববীয়া ক্ৰমে সুৰেশ বৰা, তৰুণ গগৈ, ঘন ভৰালী, মৃণাংক শইকীয়া, মনজিৎ ফুকন, আনন্দ বৰুৱা আৰু হৰিসাধন দাসে কাৰ্য্যসূচীটোত অংশগ্ৰহণ কৰে।
ইয়াৰ উপৰি চাৰিং আৰু হাফলুটিং শাখা সাহিত্য সভায়ো পৃথকে পৃথকে বিশিষ্ট শিক্ষাবিদ, সমাজকৰ্মী তথা সাহিত্যিক ক্ৰমে বিষ্ণু প্ৰসাদ নাথ, বিনু ফুকন, নিৰ্মলা দুৱৰা, প্ৰবীন কাকতি আৰু প্ৰতাপ কাকতিক ওলগ জনায়। চাৰিং শাখাৰ সভাপতি, সম্পাদক তথা সদস্য ক্ৰমে তুৱাৰাম খনিকৰ, দীপক বৰা, বিষ্ণু কাকতি, বীৰেশ্বৰ খনিকৰ আৰু ৰাজেন ফুকনে প্ৰত্যককে একোখনকৈ ফুলাম গামোচা আৰু সম্বৰ্ধনা পত্ৰৰে ওলগ জনায়।
অন্যহাতে জাঁজী শাখা সাহিত্য সভায়ো বিশিষ্ট শিক্ষাবিদ প্ৰেমধৰ নেওগক ওলগ জনায়। অনুষ্ঠানটোত শাখাটোৰ বিষয়ববীয়া ক্ৰমে প্ৰতাপ কুমাৰ বৰুৱা, জ্যোতিপ্ৰসাদ গগৈ, অসীম দত্ত আৰু অপৰূপা শইকীয়া আদি উপস্থিত থাকে।
