দেশৰ মুখ্য ন্যায়াধীশ ৰঞ্জন গগৈৰ বিৰুদ্ধে শেহতীয়াকৈ উত্থাপিত যৌন নিৰ্যাতনৰ অভিযোগ সংক্ৰান্তত এক চাঞ্চল্যকৰ ভাষ্য আগবঢ়াইছে দেশৰ এগৰাকী খ্যাতনাম অধিবক্তা উৎসৱ বেইনছে। দেওবাৰে ‘আউটলুক’ত প্ৰকাশিত এক বাতৰি অনুসৰি ৰঞ্জন গগৈৰ বিৰুদ্ধে মাত মাতিবলৈ বেইনছক ১.৫ কোটি টকাৰ উপঢৌকন যাচিছিল এটা চক্ৰই।
বাতৰি অনুসৰি, ছ’চিয়েল মিডিয়াযোগে বেইনছে দাবী কৰে যে কেইদিনমান পূৰ্বে মুখ্য ন্যায়াধীশ ৰঞ্জন গগৈক যৌন নিৰ্যাতনৰ গোচৰত সাঙোৰাৰ প্ৰস্তাৱ দি তেওঁলৈ ১.৫ কোটি টকাৰ উপঢৌকন যচা হৈছিল।
উক্ত ব্যক্তিজনৰ পৰিচয় প্ৰকাশ নকৰাকৈয়ে বেইনছে ফেচবুকৰ প’ষ্টটোত লিখিছে যে মুখ্য ন্যায়াধীশগৰাকীৰ বিৰুদ্ধে এয়া ডাঙৰ ষড়যন্ত্ৰ বুলি তেওঁৰ সন্দেহ হয় আৰু তেওঁ সেই প্ৰস্তাৱ নাকচ কৰে।
বেইনছে সংবাদ মাধ্যমৰ আগত একো কথা সদৰী কৰা নাই যদিও ফেচবুকত তেওঁ এই সন্দৰ্ভত দীঘলীয়াকৈ লিখিছে। অধিবক্তাজনে প্ৰকাশ কৰে যে মুখ্য ন্যায়াধীশৰ বিৰুদ্ধে অভিযোগ উত্থাপন কৰা মহিলাগৰাকীৰ অধিবক্তা হিচাপে গোচৰটোত কাম কৰিবলৈ তেওঁক প্ৰস্তাৱ দিয়াৰ লগতে দিল্লীৰ প্ৰেছ ক্লাবত সংবাদমেলৰ আয়োজনত সহায় কৰিবলৈও কোৱা হৈছিল।
আনহাতে, তেওঁলৈ প্ৰস্তাৱ আগবঢ়োৱা ব্যক্তিজনে নিজকে মহিলাগৰাকীৰ আত্মীয় বুলি পৰিচয় দিছিল যদিও প্ৰকৃততে মহিলাগৰাকীৰ সৈতে তেওঁৰ সম্পৰ্কতো স্পষ্ট কৰাত তেওঁ বিফল হোৱা বুলি বেইনছে ফেচবুক প’ষ্টটোত প্ৰকাশ কৰিছে।
বেইনছে প’ষ্টটোত প্ৰকাশ কৰিছে যে প্ৰকৃত পৰিচয় দাঙি ধৰিবলৈ দিবলৈ ব্যৰ্থ হোৱা ব্যক্তিজনে প্ৰথম পৰ্যায়ত তেওঁক ৫০ লাখ টকা আগবঢ়াইছিল যদিও তেওঁ সেয়া ল’বলৈ অস্বীকাৰ কৰে। ইয়াৰ পিছতে বেইনছে লোকজনক তেওঁৰ কাৰ্যালয় এৰিবলৈ নিৰ্দেশ দিছিল।
বেইনছে পাছত নিজাববীয়াকৈ বিষয়টোৰ অনুসন্ধান চলাই এয়া মুখ্য ন্যায়াধীশগৰাকীক তেওঁৰ পদৰ পৰা আঁতৰোৱাৰ এক গভীৰ ষড়যন্ত্ৰ বুলি নিশ্চিত হয়। এই সমগ্ৰ বিষয়টোৰ সন্দৰ্ভত তেওঁ সৱিশেষ উল্লেখ কৰি উচ্চতম ন্যায়ালয়ত এখন শপতনামা দাখিল কৰিব বুলিও ব্যক্ত কৰিছে।
উল্লেখযোগ্য যে স্বয়ম্ভূ ভগৱান আশাৰাম বাপুৰ বিৰুদ্ধে উত্থাপিত যৌন নিৰ্যাতনৰ গোচৰত গুচৰীয়াৰ হৈ যুক্তি প্ৰদৰ্শন কৰা অধিবক্তা উৎসৱ বেইনছে দেশৰ মুখ্য ন্যায়াধীশ ৰঞ্জন গগৈৰ বিৰুদ্ধে শেহতীয়াকৈ উত্থাপিত যৌন নিৰ্যাতনৰ অভিযোগ সংক্ৰান্তত প্ৰকাশ কৰা এই চাঞ্চল্যকৰ প’ষ্টটোৱে বিষয়টো সন্দৰ্ভত নতুন দিশৰ উন্মোচন কৰাৰ সম্ভাৱনা আছে।
