শিৱসাগৰ অসামৰিক চিকিৎসালয়ৰ চিকিৎসক ডাঃ সুমিত গাৰোডিয়া আৰু তেওঁৰ পত্নী আজি দুপৰীয়া এক ভয়ংকৰ পথ দুৰ্ঘটনাত নিহত হয়। গাৰোডিয়া দম্পতিৰ দুই পুত্ৰ বৰ্তমান চিকিৎসালয়ত মৃত্যুৰ সতে যুঁজি আছে।
আজি পুৱা শিৱসাগৰৰ পৰা হোজাইৰ আত্মীয় ঘৰত এক বিবাহ অনুষ্ঠানত অংশ ল’বলৈ গৈ কাজিৰঙাৰ সমীপৰ বুঢ়াপাহাৰ অঞ্চলত এখন ট্ৰেভেলাৰৰ সৈতে মুখামুখি সংঘৰ্ষত থিতাতে মৃত্যু হয় গাৰোডিয়া আৰু তেওঁৰ পত্নী।
দুৰ্ঘটনাত গুৰুতৰভাৱে আহত দুই পুত্ৰক ততাতৈয়াকৈ চিকিৎসালয়লৈ লৈ যোৱা হয়।
উল্লেখ্য যে দুবছৰৰ আগতে শিৱসাগৰ অসামৰিক চিকিৎসালয়ত চিকিৎসক হিচাপে নিযুক্তি লাভ কৰিছিল ডাঃ সুমিত গাৰোডিয়াই। ইয়াৰ পূৰ্বে তেওঁ শিৱসাগৰৰ অ’এনজিচি চিকিৎসালয়ত কৰ্মৰত আছিল।
অতি সহজ সৰল আৰু কম সময়তেই সকলোকে আপোন কৰি ল’ব পৰা সুমিত গাৰোডিয়া শিৱসাগৰ অসামৰিক চিকিৎসালয়খনৰ সকলো সহকৰ্মী, নাৰ্চ তথা কৰ্মচাৰী সকলৰ প্ৰিয় আছিল আৰু নিজৰ কৰ্তব্য সদায় নিষ্ঠাৰে পালন কৰি আহিছিল।
এনে এগৰাকী সুদক্ষ চিকিৎসকক অকালতে হেৰোৱাই শোকত মৰ্মাহত হৈ পৰিছে শিৱসাগৰ অসামৰিক চিকিৎসালয়খনৰ সহকৰ্মী ডাক্তৰ,নাৰ্চৰ লগতে কৰ্মচাৰীবৃন্দ।
চিকিৎসালয়খনৰ গাণনিক মিন্টু দাসে কয়, ‘’ডাঃ সুমিত গাৰোডিয়াৰ মৃত্যত শিৱসাগৰবাসীয়ে এজন সুদক্ষ চিকিৎসক হেৰুৱালো। জৰুৰীকালীন ৰোগী আহিলে ৰাতি যিকেনো সময়ত তেখেতক ফোন কৰি মাতিলে মুহুৰ্ততে উপস্থিত হয়হি। সকলোৰে লগত সদায় মিলাপ্ৰীতিৰে থকাৰ লগতে নিজৰ কৰ্তব্যত কেতিয়াও গাফিলতি কৰা নাছিল। যাৰ বাবে ৰোগী সকলৰো প্ৰিয় আছিল ডাঃ সুমিত গাৰোডিয়া।‘’
জন্মসুত্ৰে ডিব্ৰুগড়ৰ বাসিন্দা ডাঃ সুমিত গাৰোডিয়া শিৱসাগৰৰ কে পি চাৰিআলিত পৰিয়াল সহ ভাড়া ঘৰত আছিল।
