শেহতীয়াকৈ ককৰোচ জনতা পাৰ্টী চমুকৈ চিজিপিৰ সদস্যসকলে ৰাজ্যৰ বিভিন্ন বিদ্যালয় পৰিদৰ্শন কৰাৰ পাছতেই অসম চৰকাৰৰ শিক্ষা বিভাগে সমগ্ৰ ৰাজ্যৰ বিদ্যালয়সমূহৰ বাবে এক বিশেষ নিৰ্দেশনা জাৰি কৰিছে। ছাত্ৰ-ছাত্ৰীৰ নিৰাপত্তা, গোপনীয়তা, অনাময় ব্যৱস্থা আৰু শৈক্ষিক অনুশাসন সুনিশ্চিত কৰাৰ লক্ষ্যৰে জাৰি কৰা এই নিৰ্দেশনাৱলী অহা ১ অক্টোবৰৰ পৰা কাৰ্যকৰী হ’ব। নতুন নিয়ম অনুসৰি পুৱাৰ প্ৰাৰ্থনা আৰম্ভ হোৱাৰ পূৰ্বেই বিদ্যালয়ৰ মূল প্ৰৱেশদ্বাৰ বন্ধ কৰাটো বাধ্যতামূলক কৰা হৈছে আৰু চৌহদত বাহিৰাগতৰ প্ৰৱেশৰ ক্ষেত্ৰতো কঠোৰ বাধা আৰোপ কৰা হৈছে, যাৰ বাবে বাহিৰাগতসকলে চৌহদত প্ৰৱেশ কৰিবলৈ পূৰ্বানুমতি ল’ব লাগিব।
শ্ৰেণী চলি থকাৰ সময়ত বা বিদ্যালয়ৰ অন্য কাৰ্যকলাপৰ মাজত বিনা অনুমতিত বিদ্যালয় চৌহদৰ ভিতৰত কোনো ধৰণৰ আলোকচিত্ৰ বা ভিডিঅ’ গ্ৰহণ কৰাত কঠোৰ নিষেধাজ্ঞা আৰোপ কৰা হৈছে। ইয়াৰ উপৰিও বিদ্যালয় চৌহদত যাতে কোনো অনাকাংক্ষিত বা অপ্ৰীতিকৰ পৰিস্থিতিৰ সৃষ্টি নহয় আৰু এক সুস্থ শৈক্ষিক পৰিৱেশ বৰ্তি থাকে, তাৰ বাবে প্ৰয়োজনীয় ব্যৱস্থা গ্ৰহণ কৰিবলৈ কৰ্তৃপক্ষক পৰামৰ্শ দিয়া হৈছে। অনাময় ব্যৱস্থাক অগ্ৰাধিকাৰ দি শৌচালয়, প্ৰস্ৰাৱগাৰ আৰু সামগ্ৰিকভাৱে বিদ্যালয় চৌহদ পৰিষ্কাৰ আৰু স্বাস্থ্যসন্মতভাৱে ৰাখিবলৈকো কঠোৰ নিৰ্দেশ দিছে।
অৱশ্যে এই কঠোৰ নিয়মৰ মাজতো ছাত্ৰ-ছাত্ৰীৰ পিতৃ-মাতৃ, বিদ্যালয় পৰিচালনা সমিতিৰ সদস্য, শিক্ষা বিভাগৰ বিষয়া আৰু কৰ্মচাৰীসকলক প্ৰাসংগিক কাৰণত বিদ্যালয় চৌহদত প্ৰৱেশ কৰিবলৈ অনুমতি প্ৰদান কৰা হ’ব। শিক্ষা বিভাগৰ এই নতুন নিৰ্দেশনাসমূহ মূলত ককৰোচ জনতা পাৰ্টীৰ ‘স্কুল ঠিক কৰো’ অভিযানৰ প্ৰতিক্ৰিয়া হিচাপে বিবেচিত হৈছে। এই অভিযানৰ অংশ হিচাপে চিজিপিৰ সহ-আহ্বায়ক আশুতোষ ৰাংকাৰ নেতৃত্বত এটা দলে শেহতীয়াকৈ পলাশবাৰী আৰু দিছপুৰ এলেকাৰ চৰকাৰী বিদ্যালয়সমূহ পৰিদৰ্শন কৰি আন্তঃগাঁথনি আৰু মৌলিক সুবিধাসমূহৰ অভাৱৰ বিষয়টো উত্থাপন কৰিছিল। চিজিপিৰ মতে, তেওঁলোকৰ এই বিদ্যালয় অভিযানৰ মূল উদ্দেশ্য হৈছে চৰকাৰী বিদ্যালয়ৰ আন্তঃগাঁথনিৰ সুৰুঙাসমূহ পোহৰলৈ অনা আৰু সুবিধাসমূহৰ উন্নতিৰ বাবে চৰকাৰক হেঁচা প্ৰদান কৰা।
উল্লেখযোগ্য যে এই বিদ্যালয় পৰিদৰ্শনৰ কেইদিনমান পূৰ্বে গুৱাহাটীত অনুষ্ঠিত হ’বলগীয়া এক আঞ্চলিক স্বেচ্ছাসেৱকৰ সন্মিলনৰ প্ৰাকক্ষণত অসম আৰক্ষীয়ে ৰাংকাকে ধৰি কেইবাগৰাকীও চিজিপি নেতা আৰু স্বেচ্ছাসেৱকক আটক কৰি পৰৱৰ্তী সময়ত মুকলি কৰি দিছিল।
শেহতীয়া খবৰ অনুসৰি, শিক্ষামন্ত্ৰী ড০ ৰণোজ পেগুৱে সামাজিক মাধ্যমত প্ৰকাশ কৰা এক বিবৃতিযোগে জানিবলৈ দিছে যে এতিয়ালৈকে তেনে কোনো নিৰ্দেশনা জাৰি কৰা হোৱা নাই।
