ভাৰতক বদনাম কৰিবলৈ এইবাৰ নতুন কৌশল অৱলম্বন কৰিছে নেকি একাংশ চীনা নাগৰিকে? বাংলাদেশৰ ৰাজধানী ঢাকাৰ দৰিদ্ৰ বসতিপ্ৰধান অঞ্চলৰ ভিডিঅ’ সংগ্ৰহ কৰি সেইবোৰক ভাৰতৰ ৰাজধানী নতুন দিল্লীৰ দৃশ্য বুলি প্ৰচাৰ কৰাৰ অভিযোগ উত্থাপন হৈছে প্ৰায় ১৫০ গৰাকী চীনা নাগৰিকৰ বিৰুদ্ধে। চীনৰ বিভিন্ন সামাজিক মাধ্যমত পোনপটীয়া সম্প্ৰচাৰৰ জৰিয়তে ঢাকাৰ নিম্ন আয়ৰ লোকসকলৰ জীৱন-যাপন আৰু ঘৰৰ অৱস্থাক ভাৰতৰ ছবি হিচাপে উপস্থাপন কৰা হৈছে বুলি প্ৰকাশ পাইছে।
বাংলাদেশৰ সংবাদপত্ৰ প্ৰথম আলোৰ ৬ নৱেম্বৰত প্ৰকাশিত এক অনুসন্ধানমূলক প্ৰতিবেদনত এই চাঞ্চল্যকৰ তথ্য পোহৰলৈ আহিছে। প্ৰতিবেদন অনুসৰি, চীনা নাগৰিকসকলে ঢাকাৰ উত্তৰা অঞ্চলৰ ১২ নম্বৰ ছেক্টৰ আৰু ইয়াৰ কাষৰীয়া টেকপাৰাৰ সৰু সৰু গলি, বজাৰ আৰু আৱাসিক অঞ্চলত ভিডিঅ’ সংগ্ৰহ কৰি আহিছে। তেওঁলোকে ৱেইচাট আৰু ডৌইনকে ধৰি চীনৰ সামাজিক মাধ্যমত সেই ভিডিঅ’সমূহ পোনপটীয়াকৈ সম্প্ৰচাৰ কৰি অঞ্চলসমূহক নতুন দিল্লীৰ অংশ বুলি চিনাকি দিছে।
প্ৰতিবেদনত উল্লেখ কৰা অনুসৰি, মিয়ানমিয়ান নামৰ এগৰাকী চীনা মহিলাই ১ নৱেম্বৰত উত্তৰাৰ ১২ নম্বৰ ছেক্টৰৰ এটা খালৰ কাষৰ পৰা পোনপটীয়া সম্প্ৰচাৰ কৰিছিল। চীনৰ ছিচুৱান প্ৰদেশৰ বাসিন্দা বুলি পৰিচয় দিয়া মহিলাগৰাকীয়ে সেই অঞ্চলটোক নতুন দিল্লী বুলি উল্লেখ কৰাৰ লগতে স্থানীয় লোকসকলৰ ঘৰ-দুৱাৰৰ অৱস্থাক অপৰিষ্কাৰ, অনুন্নত আৰু অস্বাস্থ্যকৰ বুলি বৰ্ণনা কৰিছিল। আনকি অঞ্চলটোৰ আইন-শৃংখলাজনিত পৰিস্থিতিক লৈও অপমানজনক মন্তব্য কৰা বুলি প্ৰতিবেদনত প্ৰকাশ পাইছে।
কেৱল সেয়াই নহয়, ৱাং ৱেই নামৰ আন এজন চীনা নাগৰিকে টেকপাৰাৰ পথৰ দাঁতিৰ চাহৰ দোকানত ভিডিঅ’ সংগ্ৰহ কৰি স্থানীয় লোকসকলে খোৱা চাহক লৈও আপত্তিজনক মন্তব্য কৰিছিল। তেওঁৰ দাবী অনুসৰি, সেই চাহ গৰুৰ প্ৰস্ৰাৱ আৰু লেতেৰা নদীৰ পানীৰে প্ৰস্তুত কৰা হয়। এইদৰে বাংলাদেশৰ এখন দৰিদ্ৰ অঞ্চলৰ দৃশ্য ভাৰতৰ বুলি দেখুৱাই দেশখনৰ ভাবমূৰ্তি বিনষ্ট কৰাৰ চেষ্টা চলোৱাৰ অভিযোগ উঠিছে।
উল্লেখযোগ্য যে প্ৰথম আলোই চীনা ভাষাত কৰা পোনপটীয়া সম্প্ৰচাৰৰ কিছু অংশ গুগল ট্ৰান্সলেটৰ সহায়ত অনুবাদ কৰাৰ পাছত চীনা ভাষাৰ জ্ঞান থকা বাংলাদেশৰ চাৰিগৰাকী ব্যক্তিৰ জৰিয়তে সেই অনুবাদৰ সত্যতা পৰীক্ষা কৰিছিল।
ইফালে, স্থানীয় বাসিন্দাসকলৰ অভিযোগ অনুসৰি, ভিডিঅ’ সংগ্ৰহৰ নামত একাংশ চীনা নাগৰিকে অনুমতি অবিহনেই মানুহৰ ঘৰত প্ৰৱেশ কৰি ভিডিঅ’ নিৰ্মাণ কৰিছে। আনকি ঘৰৰ ভিতৰৰ ব্যক্তিগত স্থান আৰু শৌচাগাৰতো কেমেৰা লৈ প্ৰৱেশ কৰাৰ অভিযোগ উঠিছে। ইয়াক লৈ স্থানীয় লোকসকলৰ মাজত তীব্ৰ ক্ষোভৰ সৃষ্টি হৈছে।
এই কাৰ্যকলাপৰ আঁৰৰ প্ৰকৃত উদ্দেশ্য এতিয়াও স্পষ্ট হোৱা নাই। ফাংয়ৌ নামৰ এজন চীনা নাগৰিকে প্ৰথম আলোৰ আগত এই সম্প্ৰচাৰসমূহ সামগ্ৰী প্ৰচাৰৰ সৈতে জড়িত বুলি দাবী কৰিছিল। অৱশ্যে, কিয় ঢাকাৰ এনে দৰিদ্ৰ অঞ্চলসমূহ বাছি লোৱা হৈছে, সেই সন্দৰ্ভত তেওঁ কোনো স্পষ্ট উত্তৰ দিয়া নাই।
প্ৰতিবেদনখনে এই ঘটনাক লৈ এক গুৰুত্বপূৰ্ণ প্ৰশ্নৰ অৱতাৰণা কৰিছে—ঢাকাৰ বাস্তৱ দৃশ্যক নতুন দিল্লীৰ বুলি দেখুৱাই চীনৰ দৰ্শকৰ মাজত ভাৰতৰ বিষয়ে নেতিবাচক ধাৰণা সৃষ্টি কৰাৰ চেষ্টা চলিছে নেকি? অৱশ্যে, ইয়াৰ আঁৰত কোনো সংগঠিত অপপ্ৰচাৰ অভিযান আছে বুলি প্ৰমাণিত হোৱা নাই।
