এন এচ চি এন-আই এমৰ চাউদাৰ্ন কমান্দ উৎখাতৰ চেষ্টা কৰা আছাম ৰাইফলছৰ সৈতে নাগা আৰ্মিৰ মুখামুখি যুদ্ধৰ উপক্ৰম হোৱাত দেওবাৰে চেঁপা উত্তেজনাই আৱৰি ধৰে মণিপুৰৰ উখৰুল জিলাৰ চিলাইৰ এখন ক্ষুদ্ৰ গাওঁ।
চিলাইৰ খামাচ’ম গাঁৱত সংঘৰ্ষ উন্মুখ আছাম ৰাইফলছ আৰু নাগা আৰ্মিক শেষ মুহূৰ্তত শান্ত কৰিবলৈ সক্ষম হয় ঘটনাস্থলীত উপস্থিত হোৱা তাংখুল ফ্ৰন্তেল অৰ্গেনাইজে’চনৰ নেতাসকল।
তাংখুল নেতৃত্বৰ হস্তক্ষেপত গাওঁখন এক নিশ্চিত ৰক্তাক্ত সমুখ সমৰৰ পৰা কথমপি ৰক্ষা পৰিলেও এতিয়াও অঞ্চলটোত শাম কটা নাই উত্তেজনা।
এক সূত্ৰই নৰ্থ ইষ্ট নাও-ক জনোৱা মতে, গাওঁবাসীয়ে গীৰ্জাত কটোৱা “পবিত্ৰ” দেওবাৰৰ পুৱাই এলেকাটোত আছাম ৰাইফলছৰ সেনা সঞ্চালন দেখি স্থানীয় লোকসকল উদ্বিগ্ন হৈ পৰে আৰু দেখে যে ৰাইফলছৰ জোৱানসকলে অঞ্চলটোত উৎখাতৰ প্ৰস্তুতি চলাইছে এন এচ চি এন-আই এমৰ শিবিৰ— যাৰ নিশ্চিত পৰিণতি আছিল এক ৰক্তক্ষয়ী যুদ্ধ।
বহুমূলীয়া শান্তি প্ৰক্ৰিয়া বিনষ্ট কৰিব পৰা ৰক্তপাতৰ পৰা আঁতৰি থকাৰ উদ্দেশ্যে গাঁৱৰ বৰমূৰীয়াসকলে ততাতৈয়াকৈ হস্তক্ষেপ কৰে।
আছাম ৰাইফলছৰ সেনা সঞ্চালনৰ কথা নিশ্চিত কৰিছে উখৰুলৰ আৰক্ষী অধীক্ষক নিংচেন ৱৰংগামে।
ৱৰংগামে জনায় যে চিহাইৰ আশে-পাশে সশস্ত্ৰ বিদ্ৰোহীৰ চালচলনৰ নিশ্চিত খবৰ তেওঁলোকৰ হাতত আছে আৰু অঞ্চলটোৰ পৰা তেওঁলোকক উৎখাতৰ চেষ্টা চলোৱা হৈছে।
“পৰিস্থিতি বৰ্তমান সম্পূৰ্ণ নিয়ন্ত্ৰণাধীন, গাওঁবিলাকত এতিয়া কোনো উত্তেজনা নাই,” ৱৰংগামে জনায়।
ঘটনাটোক লৈ এন এচ চি এন-আই এমে এতিয়াও বিভাগীয় বিবৃতি জাৰি কৰা নাই যদিও সচকিত হৈ আছে গাওঁবাসী।
নৰ্থ ইষ্ট নাও-এ বহুবাৰ যোগাযোগৰ চেষ্টা কৰিছে যদিও অঞ্চলটোত সেনা সঞ্চালন সন্দৰ্ভত আছাম ৰইফলছৰ জ্যেষ্ঠ বিষয়াৰ মন্তব্য এতিয়ালৈকে জানিব পৰা হোৱা নাই।
চিলাই উখৰুল জিলাৰ উত্তৰ-পূব কোণত আৰু ই ম্যানমাৰৰ নিচেই কাষত। ই উখৰুল চহৰৰ পৰা ৩৭কিঃ মিঃ উত্তৰে আৰু ইয়াক আংশিকভাৱে ১৫০নং ৰাষ্ট্ৰীয় পথে চুই গৈছে।
