২৮ এপ্ৰিল অৰ্থাৎ দেওবাৰে অনুষ্ঠিত হৈ যোৱা এ পি ডি চি এলৰ লিখিত পৰীক্ষাত হোৱা বিসংগতি সন্দৰ্ভত মুখ্য মন্ত্ৰীলৈ পত্ৰ প্ৰেৰণ কৰি পৰীক্ষা পুনৰ অনুষ্ঠিত কৰাৰ বাবে অনুৰোধ জনায় বিৰোধী দলপতি তথা নাজিৰা বিধান সভা সমষ্টিৰ বিধায়ক দেৱব্ৰত শইকীয়াই।
পত্ৰৰ জৰিয়তে বিৰোধী দলপতি গৰাকীয়ে মুখ্য মন্ত্ৰীক উদ্দেশ্যি কয় যে দেওবাৰে অনুষ্ঠিত এ পি ডি চি এলৰ লিখিত পৰীক্ষাত ব্যাপক বিসংগতি সংঘটিত হৈছে। ছ’চিয়েল মিডিয়াত প্ৰশ্ন কাকত ফাদিল হেৱা, কিছুমান পৰীক্ষাৰ্থীক আগতীয়াকৈ উত্তৰ যোগান ধৰা আৰু মোবাইল ফোন ব্যৱহাৰ কৰাৰ বিশ্বাসযোগ্য প্ৰমাণ পোৱা গৈছে। এই সন্দৰ্ভত দুজন নিৰীক্ষক আৰু এজন পৰীক্ষাৰ্থীক আৰক্ষীয়ে ইতিমধ্যে আটক কৰিছে।
ইয়াৰ উপৰি সংবাদ মাধ্যমত শক্তি বিভাগৰ একাংশ প্ৰভাৱশালী ব্যক্তিয়ে উক্ত পদ সমুহৰ সৰহ সংখ্যকেই স্বজন তোষণ নীতি আৰু ধনৰ লেনদেনৰ জৰিয়তে নিৰ্দিষ্ট প্ৰাৰ্থীৰ বাবে সংৰক্ষণ কৰি থোৱা হৈছে বুলি বাতৰিযোগে প্ৰচাৰো হৈছে।
পত্ৰখনত আৰু উল্লেখ কৰে যে, আপোনাৰ শাসন কালত বন আৰু পৰিবেশ বিভাগ আৰু পঞ্চায়ত আৰু গ্ৰামোন্নয়ন বিভাগৰ পিছত এইটো তৃতীয় বিসংগতিপূৰ্ণ পৰীক্ষা অনুষ্ঠিত হ’ল। তেওঁ লগতে উল্লেখ কৰে যে, আপুনি অসমৰ ৰাইজক স্বচ্চ নিকা প্ৰশাসন দিয়াৰ লগতে দুৰ্নীতিৰ লগত আপোচ নকৰো বুলি বাৰম্বাৰ কৈ আহিছে যদিও চিণ্ডিকেটৰ ক্ষেত্ৰতে হওক বা চৰকাৰী নিযুক্তিৰ ক্ষেত্ৰতে হওক আপোনাৰ নেতৃত্বাধীন চৰকাৰখনে পূৰ্বৰ সকলো অভিলেখ ভংগ কৰাৰ দিশে অগ্ৰসৰ হৈছে।
পত্ৰৰ যোগেদি তেওঁ দাবী উত্থাপন কৰে যে, কেৱল বিৰোধী দলপতি ৰূপেই নহয়, অসমৰ এজন বাসিন্দা হিচাপে দাবী জনাও যে দুই লাখতকৈ অধিক নিবনুৱা পৰীক্ষাৰ্থীক অন্যায় কৰা এই বিভাগীয় পৰীক্ষাটো বাতিল কৰি পুনৰ অনুষ্ঠিত কৰা হওক।
ইয়াৰ উপৰি এ পি ডি চি এল ৰ বিসংগতিমূলক পৰীক্ষাৰ বাবে দোষী ব্যক্তি সকলৰ বিৰুদ্ধে পদবীলৈ নাচায় শাস্তি মূলক ব্যৱস্থা গ্ৰহণ কৰিবলৈ দাবী জনায়।
