‘’এনআৰচিৰ আপত্তি দাখিল প্ৰক্ৰিয়াত সংখ্যালঘু লোকৰ নামত “নামে বেনামে” আপত্তি দাখিল কৰা হৈছে।‘’ এই অভিযোগ বদৰুদ্দিন আজমল নেতৃত্বাধীন অসম জমিয়ত উলেমাৰ।
আজি দিচপুৰ প্ৰেছ ক্লাৱত অনুষ্ঠিত এখন সংবাদমেলত জমিয়ত উলেমাৰ সম্পাদক ফজলুল কৰিম কাছিমীয়ে অভিযোগ কৰি কয় যে এনআৰচিত অসমৰ বিভিন্ন ঠাইত প্ৰায় পাঁচ লাখ আপত্তি আবেদন দাখিল হৈছে।
তেওঁ লগতে অভিযোগ কৰি কয় যে কোকৰাঝাৰত এক ৰাতিত এক লাখৰো অধিক আপত্তি আবেদন দাখিল হৈছে।
আনহাতে, এবছু আৰু আছুৰ সদস্যই এনেদৰে আপত্তি আবেদন দাখিল কৰাৰ অভিযোগ কৰে অসম ৰাজ্যিক জমিয়ত উলেমাৰ সম্পাদকগৰাকীয়ে। তেওঁলোকে দাখিল কৰা আপত্তি আবেদনত নাম আৰু ঠিকনা উল্লেখ কৰিছে বুলিও তেওঁ কয়।
ইপিনে, এবছুৰ সৈতে এই সন্দৰ্ভত অসম ৰাজ্যিক জমিয়ত উলেমাৰ আজি উলুবাৰীত আলোচনা হৈছিল বুলি সংবাদমেলযোগে জানিবলৈ দি কাছিমীয়ে কয়, “এই বিষয়টো মূলতঃ আলোচনা হৈছিল। এইটো এবছুৰ কেন্দ্ৰীয় সিদ্ধান্ত নহয় বুলি প্ৰমোদ বড়োৱে আমাক জনায়।”
তদুপৰি, দাখিল হোৱা অবৈধ নথি খাৰিজ কৰিবলৈ দুয়োটা সংগঠনেই প্ৰশাসনক অনুৰোধ জনাব বুলিও তেওঁ সংবাদমেলত সদৰী কৰে। তেওঁ লগতে জানিবলৈ দিয়ে যে কোকৰাঝাৰলৈ গৈ জমিয়ত উলেমাই জিলা প্ৰশাসনক সাক্ষাৎ কৰিব।
৭১’ ৰ পিছত অহা নাগৰিকৰ ক্ষেত্ৰত অভিযোগ দাখিল কৰিলে কোনো আপত্তি নাই বুলি উল্লেখ কৰি তেওঁ কয়, “এখন বিদেশী মুক্ত ৰাষ্ট্ৰীয় নাগৰিকপঞ্জী আমিও বিচাৰো।”
