সোমবাৰে হোজাই জিলাৰ ডবকা চহৰৰ জাব্ৰাকুৱা গাঁৱত সংঘটিত হৈছে এক জঘন্য হত্যাকাণ্ড। মাত্ৰ ডেৰ মহীয়া এটি কেঁচুৱা সন্তানক নিজ পিতৃয়ে বৰ্বৰতাৰে আক্ৰমণ কৰি হত্যা কৰা ঘটনাই এতিয়া সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
ঘটনা সন্দৰ্ভত জানিব পৰা মতে পৰিয়ালৰ মাজত কাজিয়াৰ সূত্ৰপাত হোৱাক কেন্দ্ৰ কৰিয়েই পাষাণ পিতৃ আলাল উদ্দিনে নিজৰ কেঁচুৱাটোক দেৱালত খুন্দিয়াই হত্যা কৰে।
এই অমানৱীয় ঘটনা সংঘটিত হোৱাৰ খবৰ লাভ কৰাৰ লগে লগেই স্থানীয় ৰাইজে ডবকা আৰক্ষীক খবৰ দিয়ে। তৎপৰতাৰে ঘটনাস্থলত আৰক্ষীৰ লোক উপস্থিত হৈ হত্যাকাৰী পিতৃক আটক কৰি নিজৰ জিম্মাত লয়।
উল্লেখ্য যে এনে অমানৱীয় ঘটনা সংঘটিত হোৱা বাবে অঞ্চলটোত এতিয়া শোকাকূল পৰিৱেশে বিৰাজ কৰিছে।
