পশ্চিম বংগত তৃণমূল কংগ্ৰেছ সমৰ্থিত গুণ্ডা বাহিনীৰ দ্বাৰা অসম চৰকাৰৰ মন্ত্ৰী তথা নেডাৰ আহ্বায়ক হিমন্ত বিশ্ব শৰ্মা আৰু পশ্চিম বংগ ৰাজ্যিক বিজেপিৰ সভাপতি দিলীপ ঘোষৰ কনভয়ৰ ওপৰত মঙলাবাৰে নিশা কৰা আক্ৰমণৰ ঘটনাৰ প্ৰতিবাদত আজি গুৱাহাটীত বিজেপি কৰ্মী আৰু যুৱ মৰ্চাৰ সদস্যসকলে পশ্চিম বংগৰ মুখ্য মন্ত্ৰী মমতা বেনাৰ্জীৰ প্ৰতিমূৰ্তি দাহ কৰে।
প্ৰতিবাদকাৰী সকলে ৰাজপথত মমতা বেনাৰ্জীৰ প্ৰতিমূৰ্তি দাহ কৰি বিজেপি কৰ্মীৰ ওপৰত আক্ৰমণ সহ্য কৰা নহ’ব, মমতা বেনাৰ্জী হায় হায়, তৃণমূল কংগ্ৰেছ হায় হায় আদি শ্লোগানেৰে পৰিবেশ উত্তাল কৰি তোলে।
গুৱাহাটীৰ উপৰিও আজি চাংসাৰিত বিজেপি কৰ্মীসকলে মমতা বেনাৰ্জীৰ প্ৰতিমূৰ্তি দাহ কৰি হিমন্ত বিশ্ব শৰ্মাৰ ওপৰত কৰা আক্ৰমণৰ প্ৰতিবাদ সাব্যস্ত কৰে।
উল্লেখযোগ্য যে পশ্চিম বংগত নিৰ্বাচনী প্ৰচাৰ চলাবলৈ যোৱা অসমৰ বিত্ত মন্ত্ৰী তথা নেডাৰ আহ্বায়ক হিমন্ত বিশ্ব শৰ্মা আৰু পশ্চিম বংগৰ ৰাজ্যিক বিজেপিৰ সভাপতি দিলীপ ঘোষৰ কনভয়ৰ ওপৰত তৃণমূল কংগ্ৰেছৰ গুণ্ডাবাহিনীয়ে ভয়ংকৰ আক্ৰমণ সংঘটিত কৰিছিল।
আনহাতে বহু সময় ধৰি তৃণমূল কংগ্ৰেছৰ গুণ্ডাবাহিনীয়ে বিজেপিৰ কৰ্মীসকলক ঘেৰাও কৰি ৰাখে। গুণ্ডাবাহিনীৰ আক্ৰমণত বহু বিজেপি কৰ্মী আহত হয় যদিও হিমন্ত বিশ্ব শৰ্মাই শৰীৰত আঘাত পোৱা নাই।
