অসমত অনুষ্ঠিত হ’বলগা ৰাজ্যসভাৰ দুখন আসনৰ নিৰ্বাচনত এইবাৰ এ আই য়ু ডি এফে প্ৰাৰ্থী দিব বিচাৰিছে। তাৰ বাবে দলটোৰ মুৰব্বী বদৰুদ্দিন আজমলে অগপ আৰু কংগ্ৰেছৰ পৰা সমৰ্থন বিচাৰিছে। পূৰ্বতে অগপ আৰু কংগ্ৰেছৰ প্ৰাৰ্থীক বিজয়ী কৰোৱাত এ আই য়ু ডি এফে সহায় কৰাৰ কথা দোহাৰি দল দুটাৰ পৰা এইবাৰ সমৰ্থন বিচাৰিলে আজমলে।
এ আই য়ু ডি এফৰ সভাপতি আজমলে সোমবাৰে কয় যে এ আই য়ু ডি এফে বিগত সময়ছোৱাত ৰাজ্যসভা নিৰ্বাচনত বিশেষ ভূমিকা পালন কৰি আহিছে। দলৰ বিধায়কসকলে অসমৰ হকে মাত মাতিব পৰা ধৰ্ম নিৰপেক্ষ ব্যক্তিৰ সপক্ষে তেওঁলোকৰ ভোট সাব্যস্ত কৰি আহিছে। অসম গণ পৰিষদৰ পূৰ্বৰ দুজনকৈ সাংসদ কুমাৰ দীপক দাস আৰু বীৰেন্দ্ৰপ্ৰসাদ বৈশ্যক দলটোৰ অনুৰোধমৰ্মে এ আই য়ু ডি এফে ভোটদান কৰি বিজয়ী হোৱাত কৰাত সহায় কৰিছিল।
আনহাতে, ৰাষ্ট্ৰপতি নিৰ্বাচনৰ সময়ত কংগ্ৰেছ দলৰ প্ৰাৰ্থী ক্ৰমে প্ৰতিভা দেৱী সিং পাটিল আৰু প্ৰণৱ মুখাৰ্জীক বিনাচৰ্তে ভোট দিয়াৰ লগতে উপ-ৰাষ্ট্ৰপতি হামিদ আনছাৰি আৰু লোকসভাৰ অধ্যক্ষা মীৰা কুমাৰকো এ আই য়ু ডি এফে ভোট দিয়াৰ কথা উল্লেখ কৰে আজমলে।
কংগ্ৰেছ আৰু অগপৰ অনুৰোধমৰ্মে যিহেতু এ আই য়ু ডি এফে বিনাচৰ্তে তেওঁলোকৰ প্ৰাৰ্থীক ভোট দিছিল সেয়েহে এইবাৰ এ আই য়ু ডি এফ দলেও ৰাজ্যসভাত প্ৰাৰ্থিত্ব প্ৰদানৰ বিষয়টোক লৈ চিন্তা-চৰ্চা অব্যাহত ৰখাৰ কথা উল্লেখ কৰি আজমলে দলটোৰ প্ৰাৰ্থীক ৰাজ্যসভা নিৰ্বাচনত জয়ী কৰাৰ বাবে কংগ্ৰেছ-অগপৰ পৰা সমৰ্থনৰ আশা কৰাৰ কথা ব্যক্ত কৰে।
উল্লেখযোগ্য যে, অহা জুন মাহত প্ৰাক্তন প্ৰধানমন্ত্ৰী ড০ মনমোহন সিং আৰু কংগ্ৰেছী নেতা শান্তিয়াছ কুজুৰৰ কাৰ্যকাল অন্ত পৰাৰ বাবে ৰাজ্যসভাত দুখনকৈ আসন খালী হ’ব। বিধানসভাত বিৰোধী দল কংগ্ৰেছ আৰু এ আই য়ু ডি এফ মিলিও এজন প্ৰাৰ্থীক ৰাজ্যসভালৈ নিৰ্বাচিত কৰাটো কঠিন হাৱালৈ চাই এ আই য়ু ডি এফে এইবাৰ নিজাকৈ প্ৰাৰ্থী আগবঢ়োৱাৰ কথা চিন্তা কৰি নিৰ্বাচনত কংগ্ৰেছ আৰু অগপৰ সহায় বিচাৰিছে।
