দিল্লীত এইবাৰ কাৰ চৰকাৰ হ’ব? কোনে পাব সংখ্যাগৰিষ্ঠতা কিম্বা নতুন মিত্ৰজোঁটৰ কিবা সম্ভাৱনা আছে নেকি। এই সকলোবোৰ প্ৰশ্নৰ উত্তৰৰ বাবে ২৩ মে’লৈ অপেক্ষা কৰি থকাসকলে এনে উত্তৰৰ বাবে আৰু কেইদিনমান অপেক্ষা কৰিব লগীয়া হ’ব পাৰে।
ভোট গণনাৰ চূড়ান্ত ফলাফল লাভ কৰিবলৈ কিমান সময় লাগিব সেয়া কোনেও নিশ্চিতকৈ ক’ব পৰা নাই। অহা ২৩ মে’ত চূড়ান্ত ফলাফলটো নোলায়েই, ইয়াৰ বাবে আৰু কেইদিনমান ৰ’ব লগীয়া হয় সেয়াও এতিয়া ক’ব পৰা হোৱা নাই। ইয়াৰ একমাত্ৰ কাৰণ হৈছে ভিভিপেট।
দেশৰ ২১ টা বিৰোধী দলে দাবী কৰিছিল যে ভোট গণনাৰ সময়ত অন্তত ৫০ শতাংশ ভিভিপেট শ্লিপ মিলাই চোৱা হওক। উচ্চতম ন্যায়ালয়ত এই বিষয়ে আবেদনো জনোৱা হৈছিল। নিৰ্বাচন আয়োগৰ পৰা সৰ্বোচ্চ আদালতক জনোৱা হৈছিল যে ‘পঞ্চাশ শতাংশ ভিভিপেট শ্লিপ গণনা কৰিবলৈ বা মিলাই চাবলৈ গ’লে ফলাফল ঘোষণা কৰিবলৈ আৰু অন্তত পাঁচ দিন অধিক সময় লাগিব।‘ সেয়ে হ’লে চূড়ান্ত ফলাফল পিছুৱাই ২৮ মে’ পাবগৈ পাব পাৰে।
পুৱা আঠ বজাৰ পৰা ভোটগণনা আৰম্ভ হ’ব যদিও এইবাৰ যি পদ্ধতিত ভোট গণনা কৰা হ’ব তাত প্ৰথম ট্ৰেণ্ড জানিবলৈকে বহুত সময় লাগিব। ইমানদিনে দিনৰ বাৰ বজাৰ পৰাই ভোটগণনাৰ অগ্ৰগতি সম্পৰ্কে জানিব পৰা গৈছিল। কিয়নো প্ৰথম ৰাউণ্ডৰ গণনা শেষ হোৱাৰ লগে লগে নিৰ্বাচন আয়োগৰ কৰ্মচাৰীসকল দ্বিতীয় ৰাউণ্ডৰ গণনাৰ বাবে প্ৰস্তুতি কৰি লৈছিল।
এইবাৰ সেইটো কৰিব দিয়া নহয় বুলি আয়োগে কঢ়া নিৰ্দেশ দিছে। নিৰ্ভুল গণনাৰ লক্ষ্যত আয়োগে বিতৰ্ক পৰিহাৰ কৰিবলৈ এইবাৰ স্পষ্ট কৰি দিছে যে কোনো দৌৰাদৌৰি কৰা নচলিব। ভিভিপেট গণনাৰ ক্ষেত্ৰত যিখন টেবুলত যিটো বিধানসভা সমষ্টিৰ ইভিএম গণনা কৰা হয় তাতেই সেই কেন্দ্ৰৰ ভিভিপেট গণনা কাম কৰিব লাগিব।
আনহাতে, এইবাৰ পোষ্টেল বেলটৰ ক্ষেত্ৰতো ইলেকট্ৰনিক ট্ৰেন্সমিশ্যন ছিষ্টেম আৰম্ভ কৰা হৈছে। এইবাৰ পোষ্টেল বেলটৰ গণনা কৰা হ’ব আৰু তাৰ পাছতহে ইভিএমৰ গণনা আৰম্ভ কৰিব লাগিব।
নিৰ্বাচন আয়োগৰ সূত্ৰৰ পৰা জানিব পৰা মতে যিবোৰ সমষ্টিত ৪০০তকৈ অধিক বুথ আছে তাত ভিভিপেট গণনা কৰিবলৈ গ’লে ৮-৯ দিন সময় লাগি যাব। বৰ্তমান ভিভিপেট শ্লিপত কোনো বাৰকোড নাই গতিকে সেয়া হাতে হাতে গণনা কৰিব লাগিব। আয়োগৰ কথা হ’ল ইয়াৰ বাবে নিৰ্বাচনৰ চূড়ান্ত ফলাফল ২৩ মে’ৰ পৰিৱৰ্তে ২৮ মে’ হ’ব পাৰে।
ইপিনে, এইবাৰ ভোটগণনা কেন্দ্ৰৰ সন্মুখত ভিৰ হ্ৰাস কৰাৰ বাবে নিৰ্বাচন আয়োগে এটা বিশেষ এপ আৰম্ভ কৰিছে। ‘নিউ সুবিধা এপ’ নামেৰে নামকৰণ কৰা এই এপৰ জৰিয়তে ঘৰত বহিয়েই ফলাফলৰ বিতং তথ্য লাভ কৰিব পৰা যাব। তদুপৰি, ভোটাৰ হেল্পলাইন এপ তথা result.eci.gov.in খুলি ফলাফল জানিব পৰা যাব।
