প্ৰতিৱেশীক আতংকিত কৰি খোদ ৰাজধানী মহানগৰীতে ধৰ্ম, মন্দিৰ, দেৱ-দেৱী, পূজা-পাতলৰ নামত বহিছে অন্ধবিশ্বাসৰ পোহাৰ।
মহানগৰীৰ কাহিলিপাৰাৰ সোণাইঘুলিত এজন বাবা ৰূপী যুৱকে ধৰ্মৰ নাম লৈ অদ্ভুত আচৰণেৰে অঞ্চলটোত আশান্তি আৰু সন্ত্ৰাস সৃষ্টি কৰাৰ অভিযোগ আনিছে অতিষ্ঠ হৈ পৰা প্ৰতিৱেশীসকলে।
স্থানীয় লোকসকলৰ অভিযোগ, ৰবীন ৰাজবংশী নামৰ যুৱকজনে মোমায়েকৰ ঘৰতে এটা মন্দিৰ স্থাপন কৰি যোৱা প্ৰায় এবছৰ ধৰি দেখুৱাই আহিছে অস্বাভাৱিক আচৰণ আৰু উন্মাদনা।
আতংকিত এগৰাকী চুবুৰীয়া মহিলাই সংবাদ মাধ্যমৰ আগত ক’লে, “যুৱকজনে ভগৱানৰ নামত আমাৰ ওচৰ-চুবুৰীয়াসকলক আতংকত ভোগাই আছে। তেওঁ দা-কুঠাৰ লৈ ওচৰ চুবুৰীয়াক মাৰিবলৈ খেদি যায়। বলি লাগে, তেজ খাম আদি কৈ দা হাতত লৈ মানুহক খেদি যায়”।
পূজাৰ নামত দিনে-নিশাই উচ্চ হাৰত মাইক বজাই পৰিৱেশ বিনষ্ট কৰাৰ লগতে প্ৰতিৱেশীৰ ছাত্ৰ-ছাত্ৰীক পঢ়াত অসুবিধা দিয়ে। ইয়াৰ বিৰোধিতা কৰাজনকেই মাৰিবলৈ খেদি যোৱাৰ অভিযোগ কৰে মহিলাগৰাকীয়ে।
“বাবা” ৰবীন ৰাজবংশীয়ে অস্ত্ৰ হিচাপে ব্যৱহাৰ কৰে চোকা দা, ত্ৰিশূল, গদা আদি সামগ্ৰী। তেওঁ নিজৰ ঘৰতেই “শ্ৰীশ্ৰী মহামৃত্যুঞ্জয় জাগ্ৰত গণ মহাশক্তিপীঠ” নামেৰে এটা মন্দিৰ স্থাপন কৰি চলাই আছে। ধৰ্মৰ নামত চলোৱা এই কাৰবাৰত বিভিন্ন ৰোগৰ বিধানো দিয়ে “বাবা” ৰবীনে।
“তেওঁক যি সকলে সহযোগ নকৰে তেওঁলোকক সদায় প্ৰাণনাশৰ ভাবুকি দিয়ে। দেওবাৰেও চুবুৰীয়াক তেওঁ দা লৈ খেদি আহিছিল। ইয়াৰ পূৰ্বে এজন যুৱকক ত্ৰিশূলেৰে আক্ৰমণ কৰিছিল”, আন এজন প্ৰতিৱেশীৰ ভাষ্য।
আন এগৰাকী মহিলাই কয় যে ওচৰৰ প্ৰতিটো পৰিয়ালৰ এজন এজন মানুহৰ নাম লৈ চিঞৰে কোনোবা কোনোবাৰ বলি দিয়াৰ হুংকাৰ দিয়ে।
“মেট্ৰিক পৰীক্ষা, হায়াৰ ছেকেণ্ডাৰি পৰীক্ষা, ল পৰীক্ষা আদি যিকোনো পৰীক্ষাৰ সময়ত ছাত্ৰ-ছাত্ৰীৰ কথা চিন্তা নকৰে, ৰুগীয়া মানুহৰ কথা চিন্তা নকৰে, পূজা-পাতল পতাৰ সময়ত দুফালে দুটা মুখ থকা মাইক লগাই দি সকলোকে ডিষ্টাৰ্ব কৰে”, মহিলা গৰাকীয়ে কয়।
ইপিনে, “বাবা”ৰ এই কাৰ্য্যক প্ৰশ্ৰয় দিছে আন একাংশ লোকে। এখন সমিতি গঠন কৰি “বাবা”ৰ কাৰ্য্যকলাপত তেওঁলোকে সহযোগ আগ বঢ়াই আহিছে। বাবাৰ ওচৰলৈ প্ৰতিদিনে আহে একাংশ ভক্ত।
অন্ধবিশ্বাসৰ গ্ৰাসত পৰি সেইসকল ভক্তই ৰবীন ৰাজবংশীৰ বিশেষ অলৌকিক ক্ষমতা থকা বুলি দাবী কৰে। সংবাদ মাধ্যমৰ আগত তেওঁলোকে প্ৰকাশ কৰিলে “বাবা” ৰবীনে ভূত-বীৰা খেদাৰ কাহিনী।
আনহাতে, স্থানীয় অতিষ্ঠ লোকসকলে কেইবাবাৰো আৰক্ষীক বিষয়টো অৱগত কৰিছে যদিও আৰক্ষীয়ে গুৰুত্বসহকাৰে নোলোৱাৰ অভিযোগ কৰে। সোমবাৰে স্থানীয় লোকৰ অনুৰোধত এই স্থানলৈ যায় অন্ধবিশ্বাস বিৰোধী কৰ্মী দিব্যজ্যোতি শইকীয়া। শইকীয়াৰ সহযোগত স্থানীয় লোকসকলে ওদালবাক্ৰা আৰক্ষী চকীলৈ গৈ অঞ্চলটোৰ শান্তি-শৃংখলা অটুট ৰখা আৰু যুৱকজনৰ এনে কাৰ্য্য নিয়ন্ত্ৰণ কৰাৰ দাবী কৰে।
