বোকাখাত আৰক্ষীয়ে আজি বোকাখাত মহকুমা আৰু বোকাখাত আঞ্চলিক ছাত্ৰ সন্থাৰ সহযোগত বোকাখাতৰ বিভিন্ন স্থানত অভিযান চলাই ড্ৰাগছ সেৱন কৰা আৰু ড্ৰাগছ ব্যৱসায়ৰ লগত জড়িত থকা ৫ জন যুৱকক আটক কৰে।
পিছত ধৃত যুৱক কেইজনৰ তথ্যৰ ভিত্তিত বোকাখাতৰ বিভিন্ন স্থানৰ পৰা আৰক্ষীয়ে কেইবাটাও ড্ৰাগছৰ ঘাটি উৎখাত কৰিবলৈও সক্ষম হয়।
আৰক্ষীয়ে জনোৱা মতে অভিযানত আটক কৰা ৫ জন যুৱকে দীৰ্ঘদিনৰ পৰা বোকাখাতত ড্ৰাগছ সৰবৰাহ কৰাৰ লগতে বহু যুৱকক ড্ৰাগছৰ প্ৰতি আসক্ত কৰাইছিল।
ধৃত যুৱক কেইজন হ’ল বোকাখাতৰ ৪ নং দ গাঁৱৰ ৰাতুল বৰা, সাপজুৰিৰ সুব্ৰত অধিকাৰী, ৩ নং দ’ গাঁৱৰ ৰিজু দাস। আনহাতে আৰক্ষীৰ অভিযানৰ উমান পাই পলাবলৈ চেষ্টা কৰা ইকৰাজানৰ ৰাজ মেদকক আৰক্ষীয়ে এ এছ ০৫ চি ০৫১৯ নম্বৰৰ চিটি ৰাইড গাড়ীৰ পৰা ধৰিবলৈ সক্ষম হয়।
তেওঁলোকৰ পৰা আৰক্ষীয়ে বহু পৰিমাণৰ চিৰিঞ্জ, ভাং আৰু অন্যান্য সামগ্ৰী উদ্ধাৰ কৰে। ইফালে আৰক্ষী আৰু ছাত্ৰসন্থাৰ কৰ্মীয়ে এজন ব্যক্তিৰ ঘৰত এখন ভাংবাৰীও ধ্বংস কৰে।
সমপ্ৰতি ঘটনা সম্পৰ্কত বোকাখাত আৰক্ষীয়ে অভিযান অব্যাহত ৰাখিছে।
