মেৰামতিৰ বাবে বৰ্তমান বন্ধ হৈ থকা পুৰণি শৰাইঘাটৰ দলংখন যান-বাহন চলাচলৰ বাবে অহা ২০ জুনত পুনৰ মুকলি কৰি দিয়া হ’ব বুলি উত্তৰ-পূব সীমান্ত ৰে’লৱেৰ জনসম্পৰ্কৰক্ষী বিষয়া নৃপেন ভট্টাচাৰ্য্যই উল্লেখ কৰে।
উল্লেখযোগ্য যে, বিগত ২৩ মাৰ্চৰ পৰা মেৰামতিৰ বাবে শৰাইঘাটৰ পুৰণি দলংখনত যান-বাহনৰ চলাচল সাময়িকভাবে বন্ধ কৰি ৰখা হৈছিল।
পুৰণি দলংখন বন্ধ থকাৰ সময়ত নতুন শৰাইঘাটৰ দলঙখনেৰে যান-বাহনসমূহ অহা-যোৱা কৰিবলগা হোৱাৰ ফলত প্ৰায়ে যান-জঁটৰ সৃষ্টি হৈছিল।
অসম চৰকাৰে তিনিমাহৰ সময় সী্মা নিৰ্ধাৰণ কৰি উত্তৰ-পূব সীমান্ত ৰে’লৱেক দলঙখন মেৰামতি কৰাৰ দায়িত্বভাৰ অৰ্পন কৰিছিল। এই সময়ছোৱাৰ ভিতৰত মুখ্য মন্ত্ৰী সৰ্বানন্দ সোণোৱালে নিজে গৈ দলঙখনৰ মেৰামতিৰ কাম পৰ্য্যবেক্ষণ কৰিছিল।
আনহাতে, উত্তৰ-পূৱ সীমান্ত ৰে’লৱেৰ জনসম্পৰ্কৰক্ষী বিষয়া নৃপেন ভট্টাচাৰ্য্যই দলংখনৰ মেৰামতিৰ অগ্ৰগতি সম্বন্ধে সংবাদ মাধ্যমৰ আগত দলংখন মেৰামতিৰ কাম প্ৰায় শেষ পৰ্য্যায়ত উপনীত হৈছে বুলি মন্তব্য কৰে।
তেওঁ জৰাজীৰ্ণ হৈ থকা দলংখনৰ অংশবোৰৰ সকলো পুৰণি ৰড বদলি কৰি নতুন ৰড স্থাপন কৰাৰ পাছত চিমেণ্টৰ কাম সম্পূৰ্ণ হৈছে বুলি উল্লেখ কৰি চিমেণ্টৰ ওপৰত বিটুমিনৰ প্ৰলেপ দি দুদিনমান ৰৈ দিলেই ২০ তাৰিখৰ পৰা দলংখনৰ ওপৰেৰে যান-বাহন চলাচল কৰিব পৰা হ’ব বুলি কয়।
উত্তৰ-পূব সীমান্ত ৰে’লৱে পুৰণি শৰাইঘাটৰ দলংখন মেৰামতি কৰাৰ অগত যান-বাহন চলাচলৰ বাবে অতি বিপদ সংকুল পৰ্য্যায়ত আছিল।
